ގަވާއިދާ ޚިލާފަށް އެތެރެކުރަން އުޅުނު ގިނަ އަދަދެއްގެ ސިނގިރޭޓު ކަސްޓަމްސްއިން އަތުލައިގެންފި

ކަނޑުމަގުން ރާއްޖެއަށް ސިއްރުން އެތެރެކުރަން މަސައްކަތްކުރި 99،000 ސިނގިރޭޓު މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.

ކަސްޓަމްސްއިން މަޢުލޫމާތު ދެއްވާފައިވާ ގޮތުގައި، މި ގިނަ އަދަދެއްގެ ސިނގިރޭޓުތައް ހިފަހައްޓާފައިވަނީ މިމަހުގެ 5 ވަނަ ދުވަހު މާލޭ ކޮމަރޝަލް ހާބަރުންނެވެ. މި ތަކެއްޗަކީ ކަމާބެހޭ ފަރާތްތަކަށް ސިއްރުން، ގަވާއިދާ ޚިލާފަށް ރާއްޖެ އެތެރެކުރުމަށް މަސައްކަތްކޮށްފައިވާ ތަކެއްޗެވެ.

ފަހަކަށް އައިސް މިފަދަ މައްސަލަތައް ފާހަގަކުރެވޭ މިންވަރު އިތުރުވެފައިވާއިރު، ފާއިތުވި ދޮޅު މަސްދުވަހުގެ ތެރޭގައި އެކަނިވެސް ހަމަ މިގޮތަށް ރާއްޖެ އެތެރެކުރަން އުޅުނު 2 މިލިއަން ސިނގިރޭޓު ކަސްޓަމްސްއިން ވަނީ އަތުލައިގަނެފައެވެ.