ރާއްޖެއަށް މަސްތުވާތަކެތި އެތެރެކުރާ މީހުންނާއި އެތަކެތީގެ ވިޔަފާރިކުރާ މީހުންނަށް މަރުގެ އަދަބު ކަނޑައެޅޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި މުހިންމު އިސްލާހަށް މިއަދު އަމަލުކުރަން ފަށައިފިއެވެ.
މިދިޔަ ޑިސެމްބަރު މަހުގެ 3 ވަނަ ދުވަހު ރައްޔިތުންގެ މަޖިލީހުން ފާސްކޮށް، އޭގެ ތިން ދުވަސް ފަހުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގުކުރެއްވި މި ބިލަށް އަމަލުކުރަން ފަށާފައި މިވަނީ، ގާނޫނު ތަސްދީގުކުރާތާ ތިން މަސްދުވަސް ހަމަވުމުންނެވެ. އަލަށް އަމަލުކުރަން ފެށި މި ގާނޫނުގެ ދަށުން، ރާއްޖެއަށް އެތެރެވާއިރު ގެންނަ މަސްތުވާތަކެތީގެ ބާވަތާއި ބަރުދަނަށް ބަލައި ކުށްވެރިޔާގެ މައްޗަށް މަރުގެ ހުކުމް އިއްވުން ލާޒިމުވާނެއެވެ. އެގޮތުން މަރުގެ އަދަބު ކަނޑައެޅޭނީ، އެތެރެކުރި ތަކެތީގައި ކެނެބިސް ނަމަ 350 ގްރާމަށްވުރެ ގިނަވުން، ޑައިމޯފިން ނަމަ 250 ގްރާމަށްވުރެ ގިނަވުން، އަދި މި ނޫން ޖަދުވަލު 1 ގެ ބާވަތެއް ނަމަ 100 ގްރާމަށްވުރެ އިތުރުވާ ހާލަތުގައެވެ.
މިފަދަ ބޮޑު އަދަބެއް ކަނޑައެޅޭއިރު، މައްސަލައިގެ ހުރިހާ ކަމެއް މަތީ މަރުހަލާގެ ކޯޓުތަކުން އަލުން ބަލަންޖެހޭނެ ކަމަށް ގާނޫނުގައި ބަޔާންކޮށްފައިވެއެވެ. އަދި މަރުގެ ހުކުމް ތަންފީޒުކުރެވޭނީ ސުޕްރީމް ކޯޓުން މައްސަލަ ބަލާ ފަނޑިޔާރުންގެ ބެންޗުގެ ފުރިހަމަ އިއްތިފާގު އޮވެގެންނެވެ. ފަނޑިޔާރުންނަށް އިއްތިފާގު ނުވެވިއްޖެ ހާލަތެއްގައި ދެން ކަނޑައަޅަންޖެހޭނީ އުމުރަށް ޖަލަށްލުމާއެކު 1 ލައްކަ ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ އަދަބެވެ.
މި ގާނޫނުގައި އުމުރަށް ޖަލަށްލުން މާނަކޮށްފައިވަނީ، އާންމުކޮށް އޮންނަ 25 އަހަރުގެ ބަދަލުގައި، މަރުވަންދެން ޖަލުގައި ހޭދަކުރުމަށެވެ. މީގެ މާނައަކީ މި ކުށްތަކުގައި ހުކުމްކުރެވޭ މީހުންނަށް ޕެރޯލްގެ ފުރުސަތު ނުލިބުމުގެ އިތުރުން، އެއްވެސް ގޮތަކަށް އަދަބު މާފުކޮށްދެވި ނުވަތަ ލުއިކޮށްދެވިގެން ނުވާނެ ކަމެވެ. އަދި މިފަދަ މައްސަލަތަކުގައި ދައުލަތުން ކުށްވެރިޔާއާއެކު އިއުތިރާފުގެ އެއްބަސްވުމެއް ހެދުންވެސް ވަނީ މަނާކޮށްފައެވެ. ސިންގަޕޫރު ފަދަ ގައުމުތަކުގައި މިހާރުވެސް މިކަމަށް މަރުގެ އަދަބު ދެމުން އަންނައިރު، ރާއްޖޭގައި މި އަދަބު ތަންފީޒުކުރަން ފެށުމުން ރާއްޖެ ވެގެންދާނީ ދެކުނު އޭޝިއާގައި މިފަދަ ހަރުކަށި ފިޔަވަޅެއް އަޅާ ދެވަނަ ގައުމަށެވެ. ސްރީލަންކާގެ ގާނޫނުގައި މިކަމަށް މަރުގެ އަދަބު އޮތް ނަމަވެސް، އެގައުމުގައި އަމަލީ ގޮތުން އެ ހުކުމް ތަންފީޒުކުރުން އޮންނަނީ ހުއްޓާލާފައެވެ.
ކޮމެންޓު ފޮނުވާ