މެދުއިރުމަތީގެ މަސްރަޙު ހަލަބޮލިވެފައިވާ މި ދަނޑިވަޅުގައިވެސް، އައު ފަސް މަންޒިލަކުން ރާއްޖެއަށް ދަތުރުތައް ފަށާފައިވާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އަމީން ފާހަގަކުރެއްވި ގޮތުގައި، މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ރާއްޖޭގެ އޭވިއޭޝަން ދާއިރާއަށާއި ފަތުރުވެރިކަމަށް އޭގެ ނޭދެވޭ އަސަރުތައް ދަނީ ކުރަމުންނެވެ. ނަމަވެސް، މި ގޮންޖެހުންތަކާއެކުވެސް ގެއްލުންތައް ކުޑަކޮށް، ރާއްޖެއަށް އަންނަ ފަތުރުވެރިންގެ އަދަދު ހިފެހެއްޓުމަށް ސަރުކާރުން ގިނަ މަސައްކަތްތަކެއް ކުރަމުންދާކަމަށް ވަޒީރު ވިދާޅުވިއެވެ.
މިހާރުގެ ހާލަތާ ގުޅޭގޮތުން ތަފްސީލު ދެއްވަމުން ވަޒީރު ވިދާޅުވީ، ލިމިޓެޑް އޮޕަރޭޝަންތަކެއްގެ ތެރެއިން ޚާއްސަ ކޮރިޑޯތަކެއް ހުޅުވާލައިގެން ބައެއް ކޮމާޝަލް ދަތުރުތައް މިހާރު ފަށާފައިވާ ކަމަށެވެ. މިގޮތުން ރޭގެ ވަގުތެއްގައި އެމިރޭޓްސްގެ ފްލައިޓެއް ރާއްޖެ އައިސްފައިވާކަމަށާއި، ދުބާއީ އަދި ޝާރްޖާ އެއާޕޯޓުގައިވެސް ލިބިފައިވާ ހަނި ފުރުސަތުތަކެއްގެ ތެރެއިން ދަތުރުތައް ކުރިއަށްދާކަން އޭނާ ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ޖާގަ ލިބުނު މިންވަރަކުން ފަތުރުވެރިން ރާއްޖެ އަންނަމުންދާ ކަމަށާއި މިއީ މަޑުމަޑުން ނަމަވެސް ފެންނަމުންދާ އުންމީދީ ބަދަލެއް ކަމަށެވެ. އަދި މި ހާލަތުން އިޤްތިޞާދަށް ލިބޭ ގެއްލުން ކުޑަކުރުމަށްޓަކައި ޚާއްޞަ ޓީމެއް އެކުލަވާލައި، ފަތުރުވެރިން ޒިޔާރަތްކުރާ މިންވަރު އިތުރުކުރުމަށް ސަރުކާރުން ޚާއްޞަ އިސްކަމެއް ދީގެން މަސައްކަތްކުރަމުންދާ ކަމަށްވެސް ވަޒީރު ވިދާޅުވިއެވެ.
ކޮމެންޓު ފޮނުވާ