މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ޤާއިމުކޮށްފައިވާ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ އެންމެ އިސްވެރިޔާގެ މަޤާމަށް، އެ އޮތޯރިޓީގެ ހެޑް އޮފް ފައިނޭންސްގެ މަޤާމުގައި ހުންނެވި މުޙައްމަދު އިޝާން އައްޔަންކުރައްވައިފިއެވެ.
މަނީ ލޯންޑަރިންގ އާއި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން އުފައްދާފައިވާ މި ޔުނިޓުގެ އިސްވެރިޔާގެ މަޤާމަށް އިޝާން ހޮވިވަޑައިގެންނެވީ، އެ މަޤާމަށް ކުރިމަތިލުމުގެ ފުރުޞަތު އެމްއެމްއޭގެ މުވައްޒަފުންނަށް ހުޅުވާލުމުން ކުރިމަތިލެއްވި ބޭފުޅުންނާ އިންޓަވިއު ކުރުމަށްފަހުގައެވެ.
އިޝާންއަކީ މި ދާއިރާއިން ތަޢުލީމާއި ތަޖުރިބާ ލިބިވަޑައިގެން ހުންނެވި ޗާޓަރޑް އެކައުންޓަންޓެކެވެ. އޭނާއަކީ އިނގިރޭސިވިލާތުގެ ޗާޓަރޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ) ގެ އެސޯސިއޭޓް މެންބަރެއްގެ އިތުރުން، އިންސްޓިޓިއުޓް އޮފް ޗާޓަރޑް އެކައުންޓަންޓްސް އޮފް ދަ މޯލްޑިވްސްގެ އެފިލިއޭޓް މެންބަރެއް ވެސް މެއެވެ.
މަރުކަޒީ ބޭންކުގެ ޚިދުމަތާ 2014 ވަނަ އަހަރު ގުޅިވަޑައިގެންނެވި އިޝާން ވަނީ ފާއިތުވި އަހަރުތަކުގައި އެ މުއައްސަސާގެ މުހިންމު މަޤާމުތަކެއް ފުރުއްވާފައެވެ. އޭގެ ތެރޭގައި ހެޑް އޮފް ކޯޕަރޭޓް އެކައުންޓްސް ސެކްޝަނާއި، ހެޑް އޮފް ފައިނޭންޝަލް ކޮންޓްރޯލްސް ޑިވިޜަން ހިމެނޭއިރު، މާލީ ކަންކަން ބެލެހެއްޓެވުމާއި އިދާރީ ހިންގުމުގެ ދާއިރާގައި އޭނާ ވަނީ މުހިންމު ދައުރެއް އަދާކުރައްވާފައެވެ.
އެފްއައިޔޫ އަކީ މިނިވަންކަމާއެކު ހިންގާ ޔުނިޓެއް ނަމަވެސް، ޤާނޫނު ބުނާގޮތުން އެ ޔުނިޓުގެ އިސްވެރިޔާ އައްޔަންކުރުމާއި ވަކިކުރުމުގެ ބާރު ލިބިދީފައިވަނީ އެމްއެމްއޭގެ ގަވަރުނަރަށެވެ.
ކޮމެންޓު ފޮނުވާ