ހުސްވެފައިވާ ކޮމިޝަނާ އޮފް ޕޮލިސްގެ މަގާމަށް ޝައުގުވެރިވާ ފަރާތްތަކުން އެކަމަށް އެދި ހުށަހެޅުމުގެ ފުރުސަތު މިއަދު ހުޅުވާލައިފިއެވެ.
މި މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ މިއަދުން ފެށިގެން، މާޗު މަހުގެ 23 ވަނަ ދުވަހުގެ 14:00 ގެ ނިޔަލަށެވެ. ހޯމް މިނިސްޓްރީން ހާމަކޮށްފައިވާ ގޮތުގައި މި މަގާމަށް ޝަރުތު ހަމަވާނީ ފުލުހުންގެ ޚިދުމަތުގެ އެސިސްޓަންޓް ކޮމިޝަނާ އޮފް ޕޮލިސްގެ ރޭންކުން ފެށިގެން މަތީގެ ރޭންކުތަކުގައި ތިއްބެވި އޮފިސަރުންނަށެވެ.
ޕޮލިސް ކޮމިޝަނަރުގެ މަގާމު ހުސްވެފައިވަނީ، އެ މަގާމުގައި ހުންނެވި އިސްމާއިލް ނަވީން މިދިޔަ މަހުގެ ތެރޭގައި މަގާމުން ރިޓަޔާކުރެއްވުމާ ގުޅިގެންނެވެ. ނަވީން ރިޓަޔާކުރެއްވި ވަކި ޚާއްސަ ސަބަބެއް ހާމަކޮށްފައެއް ނުވެއެވެ. ފުލުހުންގެ ގާނޫނު ބަޔާންކުރާ ގޮތުން ކޮމިޝަނަރު ރިޓަޔާ ކުރައްވައިފި ނަމަ ނުވަތަ މަގާމުން ވަކިކޮށްފި ހާލަތެއްގައި، އިދާރާ ހިންގުން ވަގުތީ ގޮތުން ހަވާލުވާނީ ޑެޕިއުޓީ ކޮމިޝަނަރަކާއެވެ. އެގޮތުގެ މަތިން މިވަގުތު ފުލުހުންގެ އިދާރާ ހިންގަވަމުން ގެންދަވަނީ ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއެވެ.
އަލަށް އައްޔަނުކުރެވޭ ކޮމިޝަނަރަކީ މި ސަރުކާރުން މި މަގާމަށް އައްޔަނުކުރާ ތިންވަނަ ބޭފުޅާއެވެ. ނަވީންގެ ކުރިން މި މަގާމު ފުރުއްވީ އަލީ ޝުޖާއުއެވެ. ޝުޖާއު މަގާމުން އިސްތިއުފާ ދެއްވީ 26 އޭޕްރީލް 2025 ގައެވެ. އޭނާ އިސްތިއުފާ ދެއްވީ އާއިލީ ޒިންމާތަކުގެ އިތުރުން، 18 އޭޕްރީލް 2025 ގައި ހެންވޭރު އިމާރާތަކުން ވެއްޓި ހައްވާ ޔުމްނުއަށް ބޮޑެތި އަނިޔާތަކެއް ލިބުނު ހާދިސާގެ ތަހުގީގާ ގުޅިގެން އާންމުންގެ ފާޑުކިޔުންތައް އަމާޒުވެފައި ވަަނިކޮށެވެ.
ކޮމެންޓު ފޮނުވާ