ސްރީ ލަންކާގެ ކަނޑުގެ ސަރަހައްދާ ކައިރިން، އެމެރިކާއިން ދިން ކަމަށް ބުނާ ހަމަލާއެއްގައި އީރާނުގެ ހަނގުރާމަމަތީ މަނަވަރެއް ފައްތާލައި، އޭގެން ދަތުރުކުރި ގިނަ އަދަދެއްގެ ބަޔަކު މަރުވެއްޖެއެވެ.
ލަންކާގެ ދެކުނުން ގާތްގަނޑަކަށް 40 ކިލޯމީޓަރު (25 މޭލު) ދުރުން، ބައިނަލްއަގުވާމީ ކަނޑުގެ ސަރަހައްދުގައި އޮއްވާ މިއަދު އަޑިއަށް ގޮސްފައިވަނީ އީރާނުގެ "ފްރިގޭޓް އައިރިސް ޑެނާ" ނަމަކަށް ކިޔާ މަނަވަރެކެވެ. މި ހާދިސާގައި މަރުވި މީހުންގެ އަދަދު މިހާރު ވަނީ 87 އަށް އަރާފައެވެ. މި ހަމަލާއާ ގުޅިގެން އެމެރިކާގެ ޑިފެންސް ސެކްރެޓަރީ ވިދާޅުވީ، އިންޑިއާ ކަނޑުގެ ސަރަހައްދުގައި އީރާނުގެ މަނަވަރަށް ހަމަލާދީ ފައްތާލީ އެމެރިކާގެ ސަބްމެރިންއަކުން ކަމަށާއި، ހަމަލާދިނީ އެ މަނަވަރު އޮތީ ރައްކާތެރި ސަރަހައްދެއްގައި ކަމަށް ހީކޮށްގެން ތިއްބާ ކަމަށެވެ.
ޖުމްލަ 180 މީހުންނާއެކު ދަތުރުކުރަމުންދިޔަ މި މަނަވަރުން ފަތިހުގެ ވަގުތެއްގައި ޑިސްޓްރެސް ކޯލެއް ފޮނުވާފައިވާއިރު، ލަންކާގެ ޑިފެންސް މިނިސްޓްރީން ހާމަކުރާ ގޮތުގައި މިހާތަނަށް ސަލާމަތް ކުރެވިފައިވަނީ 33 މީހުންނެވެ. މީހުން ހޯދުމާއި ސަލާމަތް ކުރުމުގެ މަސައްކަތުގައި ލަންކާ ކަނޑުގެ ސިފައިންގެ ދެ އުޅަނދަކާއި މަތިންދާބޯޓެއް އަންނަނީ ހަރަކާތްތެރިވަމުންނެވެ. އަދިވެސް ގިނަ ބަޔަކު ގެއްލިފައިވާތީ، މީހުން ހޯދުމުގެ އޮޕަރޭޝަން ހުއްޓުމެއްނެތި ކުރިއަށްދާ ކަމަށް ލަންކާގެ ފޮރިން މިނިސްޓްރީން ވަނީ މައުލޫމާތު ދީފައެވެ.
ކޮމެންޓު ފޮނުވާ