ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކުން ފްލެޓާއި ގޯތި ހޯދައިދޭނެ ކަމަށް ބުނެ، މަކަރާއި ހީލަތުން އާންމުންގެ އަތުން ފައިސާ ހޯދަމުންދާ މައްސަލަތަކެއް ފެންމަތިވެފައިވާތީ އެކަމަށް ސަމާލުވުމަށް މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން އިލްތިމާސްކޮށްފިއެވެ.
އެ މިނިސްޓްރީން ނެރުނު ބަޔާނެއްގައި ހާމަކޮށްފައިވާ ގޮތުގައި، ސަރުކާރުގެ ބޯހިޔާވަހިކަމުގެ އެއްވެސް މަޝްރޫއެއްގެ ދަށުން ގޯތި ނުވަތަ ފްލެޓު ދޫކުރުމުގެ ކަންކަން ކުރިއަށް ގެންދަނީ ސަރުކާރުގެ ގެޒެޓުގައި ޝާއިއުކުރާ އުސޫލުތަކާއި އާންމުކުރާ އިއުލާނުތަކާ އެއްގޮތްވާ ގޮތުގެ މަތިންނެވެ. އެހެންކަމުން، ކަނޑައެޅިފައިވާ ރަސްމީ އިޖުރާއަތްތަކުގެ ބޭރުން، ވަކި ފަރުދަކަށް ނުވަތަ ބަޔަކަށް ފައިސާ ދީގެން ބޯހިޔާވަހިކަން ކަށަވަރުކުރުމުގެ އެއްވެސް ފުރުސަތެއް ނޯންނާނެ ކަމުގެ ޔަގީންކަން މިނިސްޓްރީން ވަނީ ދީފައެވެ.
މިފަދަ ކަންކަމަށް ރައްޔިތުން ހޭލުންތެރިވުމަށް ގޮވާލައި މިނިސްޓްރީން ބުނެފައިވަނީ، ސަރުކާރުގެ ޕްރޮގްރާމްތަކުގެ ތެރެއިން ދޫކުރާ ބޯހިޔާވަހިކަމެއް ހޯދުމަށްޓަކައި އެއްވެސް ފަރާތަކާ ފައިސާގެ މުއާމަލާތެއް ކުރުމަކީ ކޮށްގެންވާނެ ކަމެއް ނޫން ކަމަށެވެ. އަދި މިފަދަ ސްކޭމްތައް ހިންގާ ފަރާތްތަކުން ދައްކާ ވާހަކަތަކަށް ނުހެއްލުމަށާއި، ނުބައި މަގުތަކުން ބޯހިޔާވަހިކަން ހޯދަން މަސައްކަތް ނުކުރުމަށް ވަނީ ނަސޭހަތްތެރިވެފައެވެ.
މީގެ އިތުރުން، އިއުލާނުކުރެވިފައިވާ އުސޫލުތަކާ ޚިލާފަށް ގޯތި ނުވަތަ ފްލެޓު ހޯދުމުގެ ބޭނުމުގައި އެއްވެސް ފަރާތަކަށް ފައިސާ ދެވިފައިވާނަމަ، ލަސްނުކޮށް ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުގެ ހޮޓްލައިން ނަންބަރު 125 އަށް ގުޅުއްވައި އެ މައްސަލަ ރިޕޯޓުކުރުމަށް މިނިސްޓްރީން އެދިފައިވެއެވެ. ފާހަގަކޮށްލެވޭ ގޮތުގައި، މީގެ ކުރިންވެސް ބޯހިޔާވަހިކަމުގެ މަޝްރޫއުތައް ހިނގަމުންދާ ދުވަސްވަރު އެޗްޑީސީގެ ނަމުގައި ގުޅައި، އޮޅުވާލައިގެން ފައިސާ ހޯދުމުގެ މައްސަލަތައް ފެންމަތިވެފައިވާއިރު، މިފަދަ ކަންކަމަށް ޚާއްސަ ސަމާލުކަމެއް ދިނުމަކީ މުހިންމު ކަމެކެވެ.
ކޮމެންޓު ފޮނުވާ