އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމަ ފުޅާވެ، ދުނިޔޭގެ ބާޒާރުގައި ތެލުގެ އަގު މެދުކެނޑުމެއްނެތި ތިންވަނަ ދުވަހަށް އުފުލިއްޖެއެވެ.
ދުނިޔޭގެ މަސްރަހު ދިރާސާކުރާ ފަރާތްތަކުން ހާމަކުރާ ގޮތުގައި ތެލުގެ އަގަށް މިބަދަލު އައިސްފައިވަނީ، ހޮރްމޫޒް ކަނޑުއޮޅި ހުރަސްކޮށް ބޯޓުފަހަރު ދަތުރުކުރުމަށް ނުރައްކާވެ، ސަޕްލައިއަށް ބުރޫއަރާފާނެ ކަމުގެ ބިރު ބޮޑުވެފައިވާތީއެވެ. ރޮއިޓާސް ނިއުސް އޭޖެންސީގެ ތަފާސްހިސާބުތައް ދައްކާގޮތުން ބްރެންޓް ކްރޫޑް ތެޔޮ ފީފާއެއްގެ އަގު ވަނީ %2.2 އުފުލިފައެވެ. މިއީ ފީފާއަކުން 1.70 ޑޮލަރުގެ އިތުރުވުމެކެވެ.
މި ބަދަލާއެކު އިއްޔެގެ ނިޔަލަށް ތެޔޮ ފީފާއެއްގެ އަގު ވަނީ 82.37 ޑޮލަރަށް އަރާފައެވެ. މިއީ ފާއިތުވި އަހަރުގެ ޖެނުއަރީ މަހަށްފަހު ތެލުގެ އަގުތައް މިހާ މައްޗަށް އުފުުލުނު ފުރަތަމަ ފަހަރެވެ.
މިކަމާ ގުޅިގެން މާކެޓް ދިރާސާކުރައްވާ އައިޖީ މާކެޓްގެ އެނަލިސްޓް ޓޯނީ ސައިކަމޯ ވިދާޅުވީ، ހަނގުރާމަ ހުއްޓުމަކަށް އަންނާނެ ކަމުގެ އަލިމަގެއް ފެންނަން ނެތުމަކީ ކަންބޮޑުވުމެއް ކަމަށެވެ. އަދި ހޮރްމޫޒް ކަނޑުއޮޅި ބަންދުވެ، އެ ސަރަހައްދުގެ ހަކަތައިގެ އިންފްރާސްޓްރަކްޗާތަކަށް އީރާނުން އަމާޒުކޮށްފާނެ ކަމުގެ ބިރު އޮތުމާއެކު، މި ހަމަނުޖެހުން ދިގުލައިގެންދާ ވަރަކަށް އިތުރު ނުރައްކާތަކާ ކުރިމަތިލާން ޖެހިދާނެކަމަށް އޭނާ ލަފާކުރެއްވިއެވެ.
ކޮމެންޓު ފޮނުވާ