ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުގެ އެންވަޔަރަމަންޓް މިނިސްޓަރު އާމިނަތު ޝައުނާ، އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރުކޮށް އިއްޔެ ސުވާލުކޮށްފިއެވެ.
ޝައުނާ ކޮމިޝަނަށް ހާޒިރުކޮށް ސުވާލުކޮށްފައިވަނީ، އެމްޑީޕީގެ ވެރިކަމުގައި އިކޮނޮމިކް ކައުންސިލުން ނިންމި ނިންމުމަކާ ގުޅޭގޮތުން ކަމަށް މަޢުލޫމާތު ލިބެއެވެ. ނަމަވެސް، އޭސީސީން ބަލަމުންދާ މި މައްސަލައަކީ ސީދާ ކޮން މަޝްރޫޢަކާ ނުވަތަ ކޮން ކަހަލަ ނިންމުމަކާ ގުޅޭ މައްސަލައެއް ކަމެއް އަދި ސާފުވާގޮތް ވަނީ ނުވެފައެވެ.
މިކަމާ ގުޅިގެން ޝައުނާ ވިދާޅުވެފައިވަނީ، ވަޒީރުކަމުގެ މަގާމުގައި ހުންނެވިއިރު އޭނާ ކުރެއްވި ހުރިހާ ކަމެއްވެސް ކޮށްފައިވާނީ ޤާނޫނުއަސާސީއާއި ޤާނޫނުތަކާއި ގަވާއިދުތަކުގެ އިމުގެ ތެރެއިން ކަމަށެވެ. އަދި މަޤާމުގެ މަސްއޫލިއްޔަތު އަދާކުރެއްވުމުގައި ޤާނޫނީ އިމުން ބޭރުވެވަޑައިގެންފައި ނުވާނެކަމަށް އޭނާ ވިދާޅުވިއެވެ.
ރައީސް ޞާލިހުގެ ވެރިކަމުގައި އެންވަޔަރަމަންޓް މިނިސްޓަރުކަމާ ޝައުނާ ހަވާލުވެވަޑައިގަތީ، އޭގެ ކުރިން ރައީސް އޮފީހުގެ ޕޮލިސީ ސެކްރެޓަރީގެ މަގާމުގައި ހުންނެވުމަށްފަހުގައެވެ.
ކޮމެންޓު ފޮނުވާ