ދާޚިލީ ސަލާމަތާއި ފަންނިއްޔާތާ ބެހޭ ވުޒާރާ (ހޯމް މިނިސްޓްރީ) ގެ ސްޓޭޓް މިނިސްޓަރުގެ މަގާމުގައި ހުންނެވި އަބްދުލްމަޖީދު، ރައީސުލްޖުމްހޫރިއްޔާގެ ނިންމެވުމަކުން މިއަދު މަގާމުން ވަކިކުރައްވައިފިއެވެ. މިކަން ކަށަވަރުކޮށްދެއްވަމުން އެ ވުޒާރާގެ ތަރުޖަމާނު ފާތިމަތު ރިފާތު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޤާނޫނުއަސާސީން ލިބިދޭ ބާރުގެ ދަށުން މަޖީދު މަގާމުން ދުރުކުރެއްވީ މިއަދުގެ ވަގުތެއްގައި ކަމަށެވެ. އެހެންނަމަވެސް، މަގާމުން ވަކިކުރެއްވި ވަކި ޚާއްސަ ސަބަބެއް ސަރުކާރުގެ ކަމާބެހޭ އިދާރާތަކުން އަދި ހާމަކުރައްވާފައެއް ނުވެއެވެ.
މަގާމުން ވަކިކުރެއްވިއިރު އަބްދުލްމަޖީދު ހުންނެވީ ހޯމް މިނިސްޓްރީގެ ދަށުން ހިންގާ އެންމެ މުހިންމު ދެ އިދާރާގެ ޒިންމާދާރު ވެރިޔާގެ ގޮތުގައެވެ. އެގޮތުން ރާއްޖޭގައި މަސައްކަތްކުރާ ބިދޭސީންނާ ގުޅޭ ކަންކަން ބަލަހައްޓާ ފޮރިން ލޭބާ ޑިޕާޓްމަންޓްގެ އިސްވެރިއެއްގެ ގޮތުގައާއި، ދިވެހި ރައްޔިތުންގެ އައިޑެންޓިޓީ ކާޑާއި ރަޖިސްޓްރޭޝަނާ ގުޅޭ ކަންކަން ބަލަހައްޓާ ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) ހިންގެވުމާ ހަވާލުވެ ހުންނެވީ ވެސް އޭނާއެވެ.
ކޮމެންޓު ފޮނުވާ