ތ. ވިލުފުށީގައި ސަރުކާރުން އިމާރާތްކޮށްފައިވާ 100 ހައުސިން ޔުނިޓަށް ކުރިމަތިލުމުގެ ފުރުސަތު ހައުސިން މިނިސްޓްރީން މިއަދު ހުޅުވާލައިފިއެވެ. މި ޔުނިޓްތަކަށް އެދި ހުށަހެޅުމުގެ ފުރުސަތު ހުޅުވާލާފައިވަނީ މިއަދުން ފެށިގެން އަންނަ އޭޕްރިލް މަހުގެ 11 ވަނަ ދުވަހުގެ ނިޔަލަށެވެ.
މި ހައުސިން ޔުނިޓްތަކަކީ 2,000 އަކަފޫޓުގެ ގޯއްޗެއްގައި އިމާރާތްކޮށްފައިވާ، 1,204 އަކަފޫޓުގެ ގެތަކެކެވެ. ކޮންމެ ޔުނިޓެއްގައި ތިން ކޮޓަރި، ތިން ފާހާނާ، ސިޓިން ރޫމް އަދި ބަދިގެ ހިމެނެއެވެ. މި ތަންތަނަށް ކުރިމަތިލުމުގެ ޝަރުތުތަކުގެ ތެރޭގައި ވިލުފުށީގެ ރައްޔިތެއް ކަމުގައިވުން ނުވަތަ އެ ރަށުގައި ދިރިއުޅޭތާ 10 އަހަރު ވެފައިވުން ހިމެނެއެވެ.
ހައުސިން ޔުނިޓްތައް ދޫކުރުމަށް ހަމަޖެހިފައިވަނީ ޕޮއިންޓް އުސޫލުން އެންމެ މަތިން މާކްސް ލިބޭ 100 ފަރާތަކަށެވެ. މީގެ ތެރޭގައި ދަރިން ތިބި އަދަދަށް ބަލައި ކޮންމެ ކުއްޖަކަށް 5 ޕޮއިންޓް (ގިނަވެގެން 20 ޕޮއިންޓް) ލިބޭއިރު، އެކަނިވެރި މައިންނާއި ބަފައިންނަށް އަދި ދައުލަތުން ބަލަހައްޓާ ކުދިން ތިބޭ ފަރާތްތަކަށް އިތުރު 10 ޕޮއިންޓް ލިބޭނެކަމަށް އާންމުކޮށްފައިވާ އުސޫލުގައި ވެއެވެ.
ކޮމެންޓު ފޮނުވާ