އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް، ފީފާއިން ކޮވިޑް-19 އަށް އެހީވުމަށް ފޮނުވި 1.2 މިލިއަން ޑޮލަރަށް ހިޔާނާތްތެރިވި މައްސަލައިގައި އުފުލި ދައުވާތައް ކޯޓުގައި ސާބިތުވެއްޖެ އެވެ.
ހިޔާނާތާއި މަނީ ލޯންޑްރިންގެ ކުށުގައި ނުވަ އަހަރުގެ ޖަލު ހުކުމް ތަންފީޒު ކުރަމުންދާ ބައްސާމްގެ މައްޗަށް މިފަހަރު ދައުވާ އުފުލީ ގާތްގަނޑަކަށް 19 މިލިއަން ރުފިޔާ ހިޔާނާތްތެރިވެ، އެ ފައިސާ ބޭނުންކޮށްގެން އަމިން އެވެނިއުއިން ދެ ޕެންޓްހައުސް ގަތް ކަމަށް ބުނެއެވެ.
މި މައްސަލަ ބެލި ގާޒީ މުހައްމަދު މިސްބާހު ވިދާޅުވީ، ޑޮލަރު މާރުކުރަން ނެރުނު ފައިސާއަށްވާ ރުފިޔާ އެފްއޭއެމްގެ އެއްވެސް އެކައުންޓަކަށް ވަދެފައި ނުވާކަން ހެކިތަކުން ފެންނަ ކަމަށެވެ. އެޕާޓްމެންޓް ގަތުމަށް ބޭނުންކުރި ފައިސާ އެހެން މީހަކު ދިން ކަމަށް ބައްސާމް ބުނި ނަމަވެސް، އެއީ ގަބޫލުކުރެވޭ ވާހަކައެއް ނޫން ކަމަށް ގާޒީ ފާހަގަކުރެއްވި އެވެ.
ޝަރީއަތުން ދެއްކެވީ، 61 ދުވަހުގެ ތެރޭގައި އެޕާޓްމެންޓް ގަތުމަށް ހަ މިލިއަނަށް ވުރެ ގިނަ ރުފިޔާ ބައްސާމް ހޭދަކޮށްފައިވާއިރު، އެފަދަ ބޮޑު އަދަދެއް ހޯދި ގޮތުގެ ހެއްކެއް ނުދެއްކުނު ކަމަށެވެ. އެފްއޭއެމުން ނެރުނު ފައިސާގެ އަސްލު އޮޅުވާލައި ހިޔާނާތްތެރިވެ، އެ ފައިސާ ލޯންޑާކޮށްފައިވާކަން ސާބިތުވާތީ ދެ ދައުވާ ވެސް ސާބިތުވާ ކަމަށް ގާޒީ ނިންމެވި އެވެ. އަދަބު ކަނޑައެޅުމަށް ބާއްވާ އަޑުއެހުން އެހެން ދުވަހަކަށް ތާވަލުކޮށްފައިވެ އެވެ.
ކޮމެންޓު ފޮނުވާ