އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ތުހުމަތު ކުރެވޭ ފީފާގެ ފައިސާއަށް ޚިޔާނާތްތެރިވި ކަމަށް ބުނާ މައްސަލައިގެ ހުކުމް އާދިއްތަ ދުވަހަށް ތާވަލު ކޮށްފިއެވެ. ކްރިމިނަލް ކޯޓުން މިއަދު މައުލޫމާތު ދެއްވި ގޮތުގައި މި މައްސަލައިގެ ހުކުމް އިއްވުން އަންނަ އާދިއްތަ ދުވަހު އޮންނާނެއެވެ.
މި މައްސަލައަކީ ފީފާއިން އެފްއޭއެމްއަށް ފޮނުވި 1.2 މިލިއަން ޑޮލަރު ނުވަތަ 18 މިލިއަނަށް ވުރެ ގިނަ ރުފިޔާ ބައްސާމް ދޫކޮށްލައި ބޭނުންކުރި ކަމަށް ބުނާ މައްސަލައެކެވެ. މި މައްސަލައިގައި ބައްސާމްގެ މައްޗަށް ޚިޔާނާތާއި މަނީ ލޯންޑްރިންގެ ދައުވާ ވަނީ ކޮށްފައެވެ. މި މައްސަލަ ސާބިތުވެއްޖެނަމަ ބައްސާމްގެ މައްޗަށް އިތުރު ޖަލު ހުކުމެއް އަންނާނެއެވެ.
ބައްސާމް މިހާރުވެސް ހުރީ ޖަލުގައެވެ. އެފްއޭއެމްގެ ފައިސާއަށް ހިޔާނާތްތެރިވި މައްސަލައިގައި ހަތަރު އަހަރާއި މަނީ ލޯންޑްރިންގެ މައްސަލައިގައި ފަސް އަހަރު ހިމެނޭ ގޮތުން ޖުމްލަ ނުވަ އަހަރުގެ ޖަލު ހުކުމެއް ތަންފީޒު ކުރަމުންދާތީއެވެ. ފީފާގެ ބަހެއް ނެތި މި މައްސަލަ ނުބެލޭނެ ކަމަށް ބުނެ ބައްސާމްގެ ފަރާތުން ހައިކޯޓަށް މައްސަލަ ހުށަހެޅުނު ނަމަވެސް، އެ މައްސަލަ ހައިކޯޓުން ބޭރުކޮށްލިއެވެ. މި މައްސަލައިގައި އެފްއޭއެމްގެ ކުރީގެ އިސްވެރިންނާއި އަމީން ކޮންސްޓްރަކްޝަންގެ މައްޗަށް ވެސް ދައުލަތުން ދައުވާ އުފުލާފައިވެއެވެ.
ކޮމެންޓު ފޮނުވާ