ވޯކް ވީޒާގައި ރާއްޖެއަށް އެތެރެވުމުގެ ހުއްދަ ލިބޭނީ އީ ވީޒާ ތިބި ބިދޭސީންނަށް

ވޯކް ޕާރމިޓް ލިބިގެން ރާއްޖޭގައި މަސައްކަތްކުރާ ބިދޭސީންނަށް ރާއްޖެއަށް އެތެރެވުމުގެ ހުއްދަ ލިބޭނީ މުއްދަތު ހަމަނުވާ އީ ވީޒާއެއް އޮތް ނަމަ އެކަނި ކަމަށް މޯލްޑިވްސް އިމިގްރޭޝަނުން އަންގައިފި އެވެ. ޕާސްޕޯޓުގައި ކުރިން ދޫކޮށްފައިވާ މުއްދަތު ހަމަނުވާ ވޯކް ވީޒާއެއް އޮތް ނަމަވެސް، އީ ވީޒާ ނެތް ބިދޭސީންނަށް ރާއްޖެއަށް ވަނުމުގެ ފުރުސަތު ނުލިބޭނެ އެވެ.

އީ ވީޒާގެ ޚިދުމަތް ތައާރަފުކުރުމާއި ގުޅިގެން ވަޒީފާ އަދާކުރާ ފަރާތްތަކާއި ވަޒީފާ ދޭ ފަރާތްތައް ސަމާލުކަން ދޭން ޖެހޭ ކަންކަން އިމިގްރޭޝަނުން ފާހަގަކޮށްފައިވެ އެވެ. އަލަށް ވޯކް ޕާމިޓް ލިބިގެން ރާއްޖެ އަންނަ ބިދޭސީންނަށް ރާއްޖެއަށް އެތެރެވުމުގެ ހުއްދަ ލިބޭނީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީއިން ދޫކޮށްފައިވާ މުއްދަތު ހަމަނުވާ "އެންޓްރީ ޕާސް" ލިބިފައިވާ ނަމަ އެކަނި ކަމަށް ވެސް އެ އިދާރާއިން ބުނެ އެވެ.

ވޯކް ވީޒާ ސިސްޓަމް ތެރެއިން އޮޓަމެޓިކުން އީ ވީޒާއަށް ބަދަލުވުމުން، އެ ބިދޭސީއެއްގެ އީ ވީޒާގެ މުއްދަތު އޮތްތޯ ކަށަވަރުކުރުމަކީ އެކްސްޕެޓް އޮންލައިން ސިސްޓަމުގައި ރަޖިސްޓަރީވެފައިވާ ވަޒީފާ ދޭ ފަރާތުގެ ޒިންމާއެއް ކަމަށް އިމިގްރޭޝަނުން ބުންޏެވެ. އީ-ވީޒާގެ ސައްހަކަން ކަށަވަރުކުރުމަށް www.immigration.gov.mv/visa/status މެދުވެރިކޮށް ޗެކްކުރެވޭނެ އެވެ. އިތުރު މައުލޫމާތު ސާފުކުރުމަށް 1434، 9199157 ނުވަތަ 9919153 އަށް ގުޅުއްވުމަށް ނުވަތަ [email protected] އަށް އީމެއިލްކުރުމަށް އެ އިދާރާއިން ދަންނަވައިފައިވެ އެވެ.