ބޮޑު ކަންނެލި މަސްވެރިންގެ މުޒާހަރާގައި ހައްޔަރުކުރި ކެންދޫ ދާއިރާގެ މެންބަރު މަޢުރޫފް ޒާކިރު ފުލުހުންގެ ބަންދުން މިއަދު ދޫކޮށްލައިފިއެވެ. މިދިޔަ ބުރާސްފަތި ދުވަހު ހައްޔަރުކުރި މައުރޫފް މިވަގުތު އޮތީ ހޮސްޕިޓަލުގައި ކަމަށް އެމްޑީޕީގެ ލީގަލް ޑިރެކްޓަރު އަހްމަދު މައުރޫފް އެކްސްގައި މައުލޫމާތު ދެއްވިއެވެ.
ވައިކަރަދޫ ދާއިރާގެ މެންބަރު ޙުސައިން ޒިޔާދު ވިދާޅުވީ މައުރޫފް އޮޕަރޭޝަނެއް ކުރީ ފުލުހުން ހައްޔަރުކޮށްގެން ގެންދިޔަފަހުން ލިބުނު އަނިޔާއަކާ ގުޅިގެން ކަމަށެވެ. ނަމަވެސް ފުލުހުން ބުނީ މައުރޫފް ހޮސްޕިޓަލަށް ގެންދިޔައީ އޭނާގެ އެދިވަޑައިގަތުމުގެ މަތިން ކަމަށާއި، ބަންދުގައި ހުރިއިރު ދިމާވި ކަމަކާ ގުޅިގެން ނޫން ކަމަށެވެ.
އަހްމަދު މައުރޫފް ވިދާޅުވީ މުޒާހަރާގައި ބަންދުކުރި އެހެން ހުރިހާ ފަރާތްތަކެއް ޝަރުތެއް ނެތި މިނިވަންކުރުމަށް ތަކުރާރުކޮށް ގޮވާލާ ކަމަށާއި، މަސްވެރިންނާއެކު އެކަށީގެންވާ މަޝްވަރާއެއް ފަށައި އެމީހުންގެ ކަންބޮޑުވުންތައް ހައްލުކުރުމަށް ސަރުކާރަށް ގޮވާލާ ކަމަށެވެ. މި މައްސަލަ އެމްޑީޕީން ވަނީ ބައިނަލްއަގުވާމީ މަސައްކަތްތެރިންގެ ޖަމިއްޔާ އައިއެލްއޯއަށް ހުށައަޅާފައެވެ.
ކޮމެންޓު ފޮނުވާ