ފެނަކައާއި އެހެނިހެން ކުންފުނިތަކުގެ ނަންނަމުގައި ފޭކު ވެބްސައިޓުތައް ހިންގައިގެން ސާވޭއެއް ފުރިހަމަކުރުމުން 30،000 ރުފިޔާ ދޭނެ ކަމަށް ބުނެ ފިޝިން ސްކޭމްތައް ހިންގަމުން އަންނައިރު، އެފަދަ ސްކޭމްތަކަށް ސަމާލުވުމަށް ފުލުހުން އާންމުންނަށް އިންޒާރުދީފިއެވެ. ފުލުހުންގެ ފޭސްބުކް ޕޯސްޓެއްގައި ބުނީ، ސްކޭމަރުން އެފަދަ ސާވޭތައް ރައްޓެހިންނާ ހިއްސާކުރުމަށާއި، ޝައްކުކުރެވޭ ލިންކުތަކަށް ވަދެ އާންމު މައުލޫމާތާއި ބޭންކު އެކައުންޓްގެ މައުލޫމާތު ދިނުމަށް އެދެމުން ދާނެ ކަމަށެވެ.
ފުލުހުން ވަނީ ވެބްސައިޓަކަށް ވަނުމުގެ ކުރިން ޑޮމެއިން ޗެކްކުރުމަށާއި، ޝައްކުކުރެވޭ ލިންކުތައް ފުލުހުންގެ ސަމާލުކަމަށް ގެނައުމަށް އިލްތިމާސްކޮށް، އެފަދަ ލިންކުތައް ސޯޝަލް މީޑިއާގައި ހިއްސާނުކުރުމަށް އެދިފައެވެ. އެއްވެސް ކުންފުންޏަކުން ލިންކުތައް މެދުވެރިކޮށް ބޮޑެތި ހަދިޔާތައް ނުދޭނެ ކަމަށް ފުލުހުން ފާހަގަކުރިއެވެ. ފެނަކައިން ނެރުނު ބަޔާނެއްގައި ބުނީ އެ ކުންފުނީގެ ނަމުގައި ސޯޝަލް މީޑިއާގައި ސަބްސިޑީ ދޭނެ ކަމަށް ބުނެ ޕޭޖުތައް ހިންގާކަން ފާހަގަވެފައިވާއިރު، އެފަދަ އެއްވެސް ޕޭޖެއް ނުހިންގާ ކަމަށާއި، ފައިސާގެ މުއާމަލާތްތައް ހިންގަނީ ރަސްމީ އެކައުންޓުތަކުން ކަމަށެވެ.
ފުލުހުން ކުރިން އާންމުކުރި ތަފާސްހިސާބުތަކުގައި ވާގޮތުން މިދިޔަ ނޮވެމްބަރު މަހު ސްކޭމްގެ މައްސަލަތަކުގައި ދޮޅު މިލިއަނަށް ވުރެ ގިނަ ރުފިޔާ ގެއްލިފައިވާއިރު، އޮންލައިން ވިޔަފާރީގެ ނަމުގައި 80 މައްސަލައެއް އަދި ލިންކުތައް މެދުވެރިކޮށް ސްކޭމް ކުރުމުގެ 12 މައްސަލައެއް ރިޕޯޓުކޮށްފައިވެއެވެ. ފެނަކައިން އެދުނީ އެފަދަ ސްކޭމް ލިންކުތަކާއި ކޯލުތައް އައިސްފިނަމަ ކަމާބެހޭ ފަރާތްތަކަށް އަންގަން ސަމާލުވުމަށެވެ.
ކޮމެންޓު ފޮނުވާ