ގޭންގް ކުށްތަކާ ދެކޮޅަށް ފުލުހުން ހިންގި ހާއްސަ އޮޕަރޭޝަންގައި މިދިޔަ ހަފްތާ ބަންދުގެ 48 ގަޑިއިރުގެ ތެރޭގައި 576 ތަނެއް ބަލައި ފާސްކޮށްފައިވާ ކަމަށް މިއަދު ފުލުހުން ހާމަކޮށްފިއެވެ.
ގޭންގް ކްރައިމް ސަޕްރެޝަން ޑިޕާޓްމަންޓުން ހިންގި މި އޮޕަރޭޝަންގައި މާލެ އާއި ހުޅުމާލޭގެ އެކި ސަރަހައްދުތަކުގައި ފުލުހުން ހަރަކާތްތެރިވި އިރު، 30 އުޅަނދެއް ބަލައި ފާސްކޮށް އޭގެ ތެރެއިން 6 އުޅަނދު ޓޯކޮށްފައިވެއެވެ. މި މުއްދަތުގައި 912 މިނެޓު ވަންދެން ފުޓް ޕެޓްރޯލް ވެސް ހިންގާފައިވާ ކަމަށް ފުލުހުން ބުނެއެވެ. ނަމަވެސް މި އޮޕަރޭޝަންގައި އެއްވެސް މީހަކު ހައްޔަރުކުރި ކަމެއް ނުވަތަ އުޅަނދުތައް ޓޯކުރި ސަބަބެއް ފުލުހުން ހާމަކޮށްފައެއް ނުވެއެވެ.
ފުލުހުން މިފަދަ ބޮޑު އޮޕަރޭޝަނެއް ހިންގި ނަމަވެސް، ގާނޫނީ މިންގަނޑަށް ފެތޭ ގޭންގެއް މިހާރު ރާއްޖޭގައި ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދި ފަހުން ވިދާޅުވެފައިވެއެވެ. ދެ އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ ކުރިން ގޭންގުތަކުގައި އުޅުނު މީހުން މިހާރު އެކަން ބާއްވައި އާންމު ދިރިއުޅުމަކަށް ބަދަލުވެފައިވާ ކަމަށެވެ.
ކޮމެންޓު ފޮނުވާ