އަމީނިއްޔާ ސްކޫލުގެ ނަމުގައި ބެލެނިވެރިންނަށް މެސެޖުތައް ފޮނުވައި، އޮޅުވާލައިގެން ފައިސާ ފޭރުމުގެ ސްކޭމެއް ދައުރުވަމުންދާކަން ސްކޫލުން ހާމަކޮށް، މިކަމަށް ސަމާލުވުމަށް ބެލެނިވެރިންނަށް އިލްތިމާސްކޮށްފިއެވެ.
ސްކޫލުން ބެލެނިވެރިންނަށް ފޮނުވި މެސެޖުގައި ބުނެފައިވަނީ، ސްކޫލުގެ ނަމުގައި ދައުރުވާ މެސެޖުތަކުގައި މޯލްޑިވްސް ޕޯސްޓަށް ފައިސާ ދައްކަން ލިންކުތައް ހިމެނޭ ކަމަށެވެ. ނަމަވެސް ސްކޫލުން އެފަދަ ލިންކުތައް އެއްވެސް ހާލަތެއްގައި ފޮނުވާކަށް ނުޖެހޭނެ ކަމަށާއި، އެފަދަ މެސެޖުތަކަށް އިޖާބަ ނުދިނުމަށް ސްކޫލުން ވަނީ ގޮވާލާފައެވެ.
މިފަދަ ސްކޭމްތަކުގެ މަޤްސަދަކީ މީހުންގެ ޒާތީ މައުލޫމާތާއި ބޭންކު އެކައުންޓު ތަކުގެ ޕާސްވޯޑުތައް ހޯދައި، ނާޖާއިޒް ގޮތުގައި ފައިދާ ނެގުމެވެ. ފުލުހުންނާއި ކަމާބެހޭ އިދާރާތަކުން ވިދާޅުވާ ގޮތުގައި މިފަދަ ލިންކުތަކަށް ފިތާލުމުން ބޭންކު އެކައުންޓާއި ފޯނު ހެކްކުރުމަށް މަގުފަހިވެގެންދާނެއެވެ. އެހެންކަމުން ކަމާބެހޭ ފަރާތްތަކުން ދަނީ އެނގިގެން ނޫނީ މިފަދަ ލިންކުތަކަށް ނުވަތުމަށް ތަކުރާރުކޮށް އިލްތިމާސްކުރައްވަމުންނެވެ. މިފަދަ ސްކޭމްތައް މިހާރު ރާއްޖޭގައި އިތުރުވަމުން ދާތީ، އާންމުން މިކަމަށް ސަމާލުކަން ދިނުމަށް އިދާރާތަކުން ވަނީ ގޮވާލާފައެވެ.
ކޮމެންޓު ފޮނުވާ