ރާއްޖޭގައި މަސްތުވާތަކެތީގެ ވިޔަފާރި މުޅިން ނައްތާލުމަށް ފުލުހުން ފެށި "އޮޕަރޭޝަން އަލިމަގު" ގައި މިހާތަނަށް 90އަށް ވުރެ ގިނަ މީހުން ހައްޔަރުކޮށް، 100އަށް ވުރެ ގިނަ ތަންތަން ބަލާފައިވާ ކަމަށް ދާޚިލީ ސަލާމަތާއި ފަންނިއްޔާތު ވަޒީރު ޢަލީ އިޙްސާން ވިދާޅުވެއްޖެއެވެ. ބުރާސްފަތި ދުވަހު ހެނދުނު 05:30 ގައި ފެށި މި އޮޕަރޭޝަނަކީ ފާއިތުވި ހަމަސް ދުވަހުގެ ތެރޭގައި ފުލުހުންގެ އިންޓެލިޖެންސަށް ލިބުނު މައުލޫމާތުގެ އަލީގައި ރާއްޖޭގެ ހުރިހާ އަތޮޅެއް ހިމެނޭ ގޮތަށް ފުލުހުންގެ ހުރިހާ ބަހާތަކެއް ގުޅިގެން ހިންގި ފަހުގެ އަހަރުތަކުގައި އެންމެ ފުޅާ ދާއިރާއެއްގެ މަސައްކަތެކެވެ.
މި އޮޕަރޭޝަންގެ ތެރެއިން މަސްތުވާތަކެތި ސްޓޯރކުރަން ގެންގުޅޭ ތަންތަނާއި ވިޔަފާރިކުރާ ތަންތަން ބަލާފާސްކޮށް، ގިނަ އަދަދެއްގެ ފައިސާއާއި ޤަވާޢިދާ ޚިލާފަށް އެތެރެކޮށްފައިވާ ސިނގިރެޓް އަދި މަސްތުވާތަކެތީގެ އެކި ބާވަތްތައް ހޯދިފައިވާ ކަމަށް ވަޒީރު ވިދާޅުވިއެވެ. ވަޒީރު ވަނީ މަސްތުވާތަކެތީގެ ވިޔަފާރިކުރާ ފަރާތްތަކަށް ވަރަށް ހަރުކަށި އިންޒާރެއް ދެއްވައި، މިއަދުން ފެށިގެން މިފަދަ ފަރާތްތަކަށް އެއްވެސް ފުރުސަތެއް ނުދެއްވާނެ ކަމަށާއި ރާއްޖޭގައި މިކަމުގައި އެޅެން ހުރި އެންމެ ހަރުކަށި ފިޔަވަޅު އަޅުއްވާނެ ކަމަށް ވިދާޅުވެފައެވެ. "މިކަން ކުރާކަމަށްވަންޏާ ރާއްޖޭގައި އުޅެން އުނދަގޫވާ ވަރަށް މިކަން ކުރިއަށް ގެންދާނަން. ރާއްޖޭގައި ޑްރަގުގެ ވިޔަފާރިއެއް ދެނެއް ނުކުރެވޭނެ" ކަމަށް ވަޒީރު ވިދާޅުވިއެވެ.
މި މަސައްކަތަކީ ހަމައެކަނި ފެށުމެއް ކަމަށާއި، މަސްތުވާތަކެތީގެ ވިޔަފާރި ކުރާ ފަރާތްތަކުން އެކަން މުޅިން ހުއްޓާލާ ހިސާބުން މަސައްކަތް ހުއްޓާލާނެ ކަމަށް ވަޒީރު ފާހަގަކުރެއްވިއެވެ. މިކަމުގައި ހައްޔަރުކުރާ ފަރާތްތަކަށް އެއްވެސް ލުޔެއް ނުދިނުމަށް ރައީސް ޑރ. މުޙައްމަދު މުޢިއްޒު ތަކުރާރުކޮށް އިރުޝާދު ދެއްވާ ކަމަށް ވެސް ވަޒީރު ވިދާޅުވެ، ރައްޔިތުން އެދޭފަދަ އަމާން މާހައުލެއް ޤާއިމްކުރުމުގައި ފުލުހުން 24 ގަޑި އިރު ދެމިތިބޭނެ ކަމުގެ ޔަޤީންކަން ދެއްވިއެވެ.
ކޮމެންޓު ފޮނުވާ