އައްޑޫއަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝަންގްރިއްލާ ވިލިނގިލި ރިސޯޓް ހުޅުވުމަށް ކުރަމުން އަންނަ ތައްޔާރީތައް ބައްލަވާލައްވައިފި އެވެ. ރައީސްގެ އަރިހުގައި ރިސޯޓުގެ އިސްވެރިންނާއި ޓޫރިޒަމް މިނިސްޓްރީގެ އިސްބޭފުޅުން ބައިވެރިވެވަޑައިގެން ރިސޯޓުގެ މަސައްކަތްތައް ބައްލަވާލައްވައިފައިވެ އެވެ.
ޝަންގްރިއްލާގެ ޖެނެރަލް މެނޭޖަރު ހަވޭ ޑޫބޮސްކް ދާދިފަހުން އައްޑޫ ސިޓީ ކައުންސިލާ ބައްދަލުކުރައްވައި، ރިސޯޓް ހުޅުވުމުގެ މަސައްކަތްތަކުގެ މައުލޫމާތު ހިއްސާކުރައްވައިފައިވެ އެވެ. މުވައްޒަފުން ނެގުމުގެ މަރުހަލާ މި މަހުން ފެށިގެން އައްޑޫގެ އެކި އަވަށްތަކުގައި ކުރިއަށްގެންދާނެ ކަމަށް އެ ބައްދަލުވުމުގައި ރިސޯޓުގެ އިސްވެރިން ވިދާޅުވިއެވެ. ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވީ އަންނަ ޑިސެމްބަރު މަހުގެ ފަހުކޮޅު ރިސޯޓް އޮޕަރޭޝަނަށް ގެނައުމަށް ތައްޔާރުވަމުން އަންނަ ކަމަށެވެ.
2020 ވަނަ އަހަރުގެ މާޗް މަހު ކޮވިޑް-19 ގެ ވަބާގެ ތެރޭގައި ބަންދުކުރި ޝަންގްރިއްލާ ވިލިނގިލި ރިސޯޓަކީ 284 އެނދުގެ ރާއްޖޭގެ އެންމެ މަތީ ފަންތީގެ ރިސޯޓެކެވެ. ގަން އެއާޕޯޓުން ލޯންޗްގައި ފަސްވަރަކަށް މިނިޓުން ދެވޭ މި ރިސޯޓުގައި ގޮލްފް ކޯހެއް ވެސް އޮވެއެވެ. އައްޑޫގެ ވަރަށް ގިނަ ބަޔަކު ވަޒީފާ އަދާކުރަމުން ދިޔަ މި ރިސޯޓް ދިގު މުއްދަތަކަށް ނުހުޅުވި ހުރުމަކީ އައްޑޫ ރައްޔިތުންގެ ބޮޑު ކަންބޮޑުވުމެކެވެ.
ކޮމެންޓު ފޮނުވާ