ލ. އަތޮޅުގައި ބަނދަރަކާއެކު ބަންކަރިން ހިދުމަތް ފެށުމަށް ކުރަމުންދާ މަސައްކަތް ވަރަށް ބާރަށް ކުރިއަށްދާ ކަމަށާއި އެ ވައުދު ފުއްދުމުގައި ކާމިޔާބުވާނެ ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިދިޔަ އަންގާރަ ދުވަހުގެރޭ ލ. ގަމުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ މި ހިދުމަތް ފެށުމަށް ކުރަންޖެހޭ ހުރިހާ ކަމެއް ވަރަށް ބާރަށް ކުރިއަށްދާ ކަމަށެވެ. މި ކަމަށް ޝައުގުވެރިވާ ފަރާތްތަކުން އެކަމަށް ކުރިމަތިލާން ހުޅުވާލި އެކްސްޕްރެޝަން އޮފް އިންޓަރެސްޓަށް އެކި ފަރާތްތަކުން ކުރިމަތިލާފައިވާ ކަމަށާއި މިހާރު ކުރިއަށްދަނީ އެ އެޕްލިކޭޝަންތަކުގެ ތެރެއިން އެންމެ ރަނގަޅު ފަރާތެއް ހޮވައި މޯލްޑިވްސް ޕޯސްޓް ލިމިޓެޑްއާ އެކު އެއްބަސްވުމަކަށް އައުމަށް ކުރަންޖެހޭ މަސައްކަތްތައް ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި މި ބަނދަރު ގާއިމުކުރެވޭނީ ލ. ފޮނަދޫއާއި ގާދޫއާ ދެމެދުގައި އޮތް ސަރަހައްދުގައި ކަމަށެވެ. މިއީ ސަރުކާރުން ވަރަށް ބޮޑު އިސްކަމެއް ދެއްވައިގެން ކުރިއަށްގެންދަވާ މަޝްރޫއެއް ކަމަށާއި މިކަމާ ބެހޭ ވުޒާރާއިންވެސް މަސައްކަތް ކުރިއަށް ގެންދާ ކަމަށް ރައީސް ވިދާޅުވިއެވެ. ސިންގަޕޫރުގައި މިދިޔަ ޖުލައި މަހު ބޭއްވި އިންވެސްޓްމަންޓް ފޯރަމްގައި ވަނީ މި ފުރުސަތު އިންވެސްޓަރުންނަށް ހުޅުވާލައިފައެވެ.
އިކޮނޮމިކް މިނިސްޓްރީން ހާމަކުރި ގޮތުގައި މި މަޝްރޫއުގައި ބަންކަރިން ހިދުމަތް ދިނުމާއި ބަނދަރާ ގުޅޭ އިންފްރާސްޓްރަކްޗާ ގާއިމުކުރުމާއި ސްޓޯރޭޖް ފެސިލިޓީ އަދި ސަޕޯޓް އިންފްރާސްޓްރަކްޗާ ހިމެނެއެވެ. މި ސަރުކާރުން ވަނީ ރާއްޖޭގެ އުތުރުގައި ވެސް ބަންކަރިން ހިދުމަތް ފަށައިފައިވާއިރު، އެ ހިދުމަތުން މިހާތަނަށް 192 މިލިއަން ރުފިޔާ ލިބިފައިވާ ކަމަށް އިކޮނޮމިކް މިނިސްޓްރީން ހާމަކޮށްފައިވެއެވެ.
ކޮމެންޓު ފޮނުވާ