ލ. ގަމަށް ވަޑައިގެން މިރޭ ދެއްކެވި ވާހަކަފުޅުގައި ރައީސް ޑރ. މުހައްމަދު މުއިއްޒު ވިދާޅުވީ ކުރިއަށް އޮތް 10 ދުވަހުގެ ތެރޭގައި ސަރުކާރުން އަމިއްލަ ވިޔަފާރިތަކަށް ދައްކަން ޖެހޭ 2.3 ބިލިއަން ރުފިޔާ ދައްކައި ނިންމާނެ ކަމަށެވެ. މި ފައިސާ ދައްކާނީ ގާނޫނާއި ގަވައިދުތަކުގެ ތެރެއިން ގޮސް ކަމަށާއި، ފައިސާ ޗާޕު ނުކުރައްވާނެ ކަމަށް ރައީސް ވަނީ ތަކުރާރުކޮށް ވިދާޅުވެފައެވެ.
ރައީސް ވަނީ މިމަހު ދެވަނަ ދުވަހު ފަސް ހަފްތާ ތެރޭ ސަރުކާރުން އަމިއްލަ ވިޔަފާރިތަކަށް ނުދައްކާ ހުރި ބިލުތައް ދައްކާނެ ކަމަށް ވިދާޅުވެފައެވެ. އެ މުއްދަތު ނިމެން ކައިރިވެފައިވާއިރު، ޕެންޝަން އޮފީހާއި މަރުކަޒީ ބޭންކް އެމްއެމްއޭއާ ދެމެދު ފައިސާގެ މުއާމަލާތެއް ކުރުމާ ގުޅިގެން ސަރުކާރުން ފައިސާ ޗާޕުކުރާ ކަމުގެ ތުހުމަތުތައް ވަނީ ފެންމަތިވެފައެވެ.
އެ މަނިކުފާނު ވިދާޅުވީ އިމާރާތްކުރުމުގެ ދާއިރާގައި މަސައްކަތް ކުރާ އަމިއްލަ ކުންފުނިތަކަށް މި 10 ދުވަސް ތެރޭގައި ސަރުކާރުގެ ގިނަ މަޝްރޫއުތައް ހަވާލުކުރާނެ ކަމަށެވެ. ރައްޖޭގެ ދެވަނަ ނުވަތަ ތިންވަނަ އެންމެ ބޮޑު ސިނާއަތަކީ އިމާރާތްކުރުމުގެ ސިނާއަތް ކަމަށާއި، މީގެ ކުރިން ސިޔާސަތުތަކުގެ ސަބަބުން އެ ސިނާއަތް އޮތީ އަނދަވަޅަކަށް ވެއްޓިފައި ކަމަށް ރައީސް ވިދާޅުވިއެވެ. ސްކޫލުތަކާއި، ހެލްތު ސެންޓަރުތަކާއި، ކުޅިވަރު އިމާރާތްތަކާއި، މިސްކިތްތައް އެޅުމުގެ މަސައްކަތްތައް އަމިއްލަ ކުންފުނިތަކާ ހަވާލުކުރާނެ ކަމަށް އެ މަނިކުފާނު ވިދާޅުވިއެވެ. މި ފައިސާތައް ލިބުމުން ކުދި އަދި މެދު ފަންތީގެ ކުންފުނިތަކުން މަސައްކަތް ކުރާ ގިނަ ދިވެހި ރައްޔިތުން މުއްސަނދިވެގެންދާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ