ސްކޭމްކޮށްގެން ފައިސާ ހޯދުމަށް ބޭނުންކުރާ ނަމްބަރުތަކާއި އެކައުންޓް ނަމްބަރުތައް ދެނެގަނެވޭނެ މޮބައިލް އެޕްލިކޭޝަނެއް ފުލުހުން ތައާރަފުކުރުމަށް ތައްޔާރުވަމުން އަންނަ ކަމަށް އިންސްޕެކްޓާ އޮފް ޕޮލިސް އަޒީފް އައްބާސް ހާމަކުރައްވައިފި އެވެ. ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން އޭނާ ވިދާޅުވީ، އެ އެޕްގައި ސްކޭމަރުންގެ ނަމްބަރުތަކާއި އެކައުންޓް ނަމްބަރުތަކާއެކު، ފިޝިން ލިންކާއި ޕްރޮމްޓް މެސެޖުގެ މައުލޫމާތު ވެސް ފެންނާނެ ކަމަށެވެ.
މީހަކަށް ސްކޭމް ކޯލެއް އަތުވެއްޖެނަމަ، އެ މައުލޫމާތު އެޕަށް ރިޕޯޓްކުރެވޭނެ އެވެ. ފުލުހުން އެ މައުލޫމާތު ކަށަވަރުކުރުމަށްފަހު، އާންމުންނަށް ފެންނާނެ ގޮތަށް ޕަބްލިޝްކުރާނެ އެވެ. ކޮންމެ އަށް ގަޑިއިރަކުން އެޕް އަޕްޑޭޓް ކުރެވޭނެ ކަމަށާއި، ޝައްކުކުރެވޭ ނަމްބަރަކާއި ލިންކަކާ ބެހޭ މައުލޫމާތު ސާޗްކޮށްގެން ބެލޭނެ ކަމަށް އަޒީފް ވިދާޅުވި އެވެ.
އަޒީފް ފާހަގަކުރެއްވީ، ސްކޭމް ނަމްބަރުތައް ޕަބްލިޝްކުރާ އިރު އިންޓަނެޓް ހިދުމަތްދޭ ފަރާތްތަކުން ވީހާވެސް އަވަހަކަށް ފިޔަވަޅު އަޅަންޖެހޭ ކަމަށެވެ. އެ ފިޔަވަޅު ލަސްވުމުން ސްކޭމްގައި ޖެހޭ މީހުންގެ އަދަދު އިތުރުވާ ކަމަށް ވެސް އޭނާ ވިދާޅުވި އެވެ. މީގެ އިތުރުން، ސްކޭމްގެ މައްސަލަތަކުގެ ތަހުގީގު ކުރިއަށް ދާ ގޮތުގެ އަޕްޑޭޓް ވެސް މި އެޕް މެދުވެރިކޮށް ލިބޭނެ ކަމަށް އޭނާ ބުނެފައިވެ އެވެ.
ކޮމެންޓު ފޮނުވާ