ށ. ކޮމަންޑޫގެ ރައްޔިތުންނާ ރޭ ބައްދަލުކުރައްވައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ، އެއަރޕޯޓްތައް ތަރައްޤީކުރުމަކީ އިންވެސްޓަރުންނަށް ޔަޤީންކަން ލިބިގެންދާނެ މުހިންމު ކަމެއް ކަމުގައެވެ. އިޤްތިޞާދު ފުޅާކުރުމަށް ކުރައްވާ މަސައްކަތުގެ ނަތީޖާ ފެންނަމުންދާ ކަމަށް ރައީސް ވިދާޅުވެ، ކުރިއަށްއޮތް ދުވަސްތަކުގައި އެކަމުގެ އިޙްސާސް ރައްޔިތުންނަށް ކުރެވިގެންދާނެކަން ޔަޤީންކުރައްވާކަމުގައި ވިދާޅުވިއެވެ.
މިލަދުންމަޑުލު އުތުރުބުރީގައި ފަތުރުވެރިކަން ފުޅާކުރުމަށް އިންވެސްޓަރުންނަށް ލުއިފަސޭހަކަމާއެކު ފުރުޞަތު ދެއްވާފައިވާކަމަށާއި، ފަތުރުވެރިކަން ދިމާވުމާއެކު ޒުވާނުންނަށް ރަށާކައިރިން ވަޒީފާ ލިބިގެންދާނެކަމަށް ރައީސް ފާހަގަކުރެއްވިއެވެ. ޑިޖިޓަލް އަދި ކްރިއޭޓިވް އިކޮނޮމީގެ ދާއިރާ ތަރައްޤީކުރުމުގެ ގޮތުން، ޕޭޕަލްއާއި އުރީދޫ ފިންޓެކް ގުޅިގެން އެޚިދުމަތް ރާއްޖެއަށް ތަޢާރަފުކުރުމަށް ހަމަޖެހިފައިވާކަމަށާއި، މިފަދަ ފުރުޞަތުތަކުން ދިވެހި ޒުވާނުންނަށް ފައިދާކުރާނެކަމުގައި ރައީސް ވިދާޅުވިއެވެ. 2026 ވަނަ އަހަރު ޤައުމީ އުފެއްދުންތެރިކަމުގެ އަހަރުގެ ގޮތުގައި ކަނޑައަޅުއްވާފައިވާކަން ފާހަގަކުރައްވައި، އެކި ދާއިރާތަކުން އުފެއްދުންތެރިކަން ކުރިއަރުވަން ރައީސް ހިތްވަރުދެއްވިއެވެ.
ކޮމެންޓު ފޮނުވާ