ށ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ފޭދޫގެ ރައްޔިތުންނާ ބައްދަލު ކުރައްވައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ރައްޔިތުން އެދޭ ސްޕީޑުގައި ތަރައްގީގެ މަޝްރޫއުތައް ކުރިޔަށް ގެންދިއުމަކީ ސަރުކާރުގެ ސިޔާސަތުކަމަށެވެ. ރިޔާސީ އިންތިހާބުގެ ވައުދުތައް ފުއްދުމަށް މަސައްކަތް ކުރަމުން ގެންދާކަން ފާހަގަކުރައްވަމުން ރައީސް ވިދާޅުވީ ބައެއް ރަށްތަކުގައި ހުއްޓިފައިވާ މަޝްރޫއުތައް ކުރިޔަށް ދިއުމުގެ މަގު ހޯދާފައިވާކަމަށެވެ.
މަޝްރޫއުތައް ކުރިޔަށް ނުގޮސް އޮތް އެންމެ ބޮޑު ސަބަބަކީ ފައިސާ ދޫކުރި ކުންފުނިތަކުން މަސައްކަތް ނުކުރުން ކަމަށާއި، އެފަދަ ކުންފުނިތަކުގެ އަތުން މަޝްރޫއު ނަގައި އެއްބަސްވުން ބާތިލު ކުރާނެކަމަށް ރައީސް ވިދާޅުވިއެވެ. ފޭދޫގައި ދެ އަހަރު ވަންދެން މަޑުޖެހިފައިވާ ސްކޫލު ތަރައްގީ ކުރުމުގެ މަޝްރޫއަށް ރައީސް އިސްކަމެއް ދެއްވައި، ދަތުރުފުޅަށްފަހު ބާރު ދުވެލީގައި މަލްޓިޕާޕަސް ހޯލާއި ކުލާސްރޫމްތައް ތަރައްގީ ކުރުމުގެ މަސައްކަތް ފަށްޓަވައި ހައްލު ހޯދައިދެއްވާނެކަމުގެ ޔަގީންކަން ދެއްވިއެވެ.
މީގެ އިތުރުން މޫދަށް އެރޭނެ ސަރަހައްދެއް ތަރައްގީ ކުރުމާއި ބަނދަރު ތަރައްގީ ކުރުމުގެ މަސައްކަތް ކުރިޔަށް ގެންދަވާނެކަމަށް ރައީސް ވިދާޅުވިއެވެ. މި ދަތުރުފުޅުގައި ގޮނޑުދޮށް ހިމާޔަތްކުރުމާއި މަގުތައް ޒަމާނީ ފެންވަރަށް ތަރައްގީ ކުރުމުގެ އެއްބަސްވުމުގައި ސޮއި ކުރެވިފައިވާއިރު، ސިއްހީ މަރުކަޒުން 24 ގަޑިއިރުގެ ހިދުމަތް ލިބޭނެ އިންތިޒާމުތައް ވެސް ހަމަޖައްސަވަމުން ގެންދަވާކަމަށް ރައީސް ވިދާޅުވިއެވެ.
ކޮމެންޓު ފޮނުވާ