ށ. އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ގޮއިދޫ ރައްޔިތުންނާ ބައްދަލުކުރައްވައި، ރައީސް ޑރ. މުޙައްމަދު މުއިއްޒު މިއަދު ވިދާޅުވީ ނަތީޖާ ނެރެދިނުން ފިޔަވައި މި ސަރުކާރުގައި އެހެން އެއްވެސް ޝައުގުވެރިކަމެއް ނެތް ކަމަށެވެ.
ރައީސް ވިދާޅުވީ ރަށްރަށަށް ވަޑައިގަންނަވަނީ ވައުދުވެވަޑައިގެންނެވި ކަންކަން ފުއްދުމަށާއި، ރައްޔިތުން ބޭނުންވާ ކަންކަން އޮޅުންފިލުވައިގެން އެ ކަންކަން ކޮށްދިނުމުގެ ބޭނުމުގައި ކަމަށެވެ. އެ މަނިކުފާނު ވަނީ މި ސަރުކާރުގައި ހުރިހާ ފޯކަސްއެއް ހުރީ ނަތީޖާ ނެރެދިނުމަށް ކަމަށް ވިދާޅުވެފައެވެ.
ރައީސް ވިދާޅުވީ މި އަހަރާއި އަންނަ އަހަރު ތެރޭގައި ފެންނާނީ މަޝްރޫއުތައް ނިމެމުންދާ މަންޒަރު ކަމަށެވެ. މި ހުރިހާ ދުވަހު ރައްޔިތުންނަށް ނުވެފައި ހުރި ކަންކަމާއި ރަނގަޅަށް ގޮސްފައި ހުރި ކަންކަމަށް ބަލައި އެ ކަންކަން ކޮށްދެއްވާނެ ކަމަށް އެ މަނިކުފާނު ވިދާޅުވިއެވެ.
ގޮއިދޫއަށް ކޮށްދެއްވާނެ ކަމަށް ވައުދުވެވަޑައިގެންނެވި ކަންކަމުގެ ތެރޭގައި ދަނޑުވެރިންނަށް ބޭނުންވާ ޔުޓިލިޓީ ޚިދުމަތްތައް ފޯރުކޮށްދިނުމާއި، އަށް ކުލާސްރޫމުގެ މަސައްކަތް ނިންމައި އަންނަ ދިރާސީ އަހަރު ބޭނުންކުރަން ފެށުމާއި، އަންނަ އަހަރުގެ ބަޖެޓުގައި ފުޓުބޯޅަ ދަނޑު ހެދުމަށް ފައިސާ ހިމެނުމާއި، ވޮލީބޯޅަ ކޯޓާއި ހޭންޑްބޯޅަ ކޯޓު ހެދުން ހިމެނެއެވެ. ތަރައްގީގެ މަޝްރޫއުތައް ނިންމުމަށް ބޭނުންވާ ބޮޑުހިލައިގެ ބޮޑު ޝިޕްމަންޓެއް އެމްޓީސީސީން ރާއްޖެ ގެނައުމުގެ މަސައްކަތް ވަނީ ކުރިއަށް ގެންގޮސްފައެވެ.
ކޮމެންޓު ފޮނުވާ