27،773 ބިދޭސީއެއްގެ ބަޔޯމެޓްރިކް މައުލޫމާތު އަދި އަޕްޑޭޓު ކޮށްފައި ނުވާ ކަމަށާއި އެ ހުރިހާ ބިދޭސީން ޑީޕޯޓު ކުރާނެކަމުގެ އިންޒާރު ހޯމްލޭންޑް ސެކިއުރިޓީ މިނިސްޓްރީން ދީފިއެވެ. އެކްސްޕެޓް އޮންލައިން ސިސްޓަމްގައި ރަޖިސްޓްރީ ކޮށްފައިވާ 3،942 އަމިއްލަ ފަރާތާއި ވަޒީފާދޭ ކުންފުނިތަކުގެ ބެލުމުގެ ދަށުން ތިބި މި ބިދޭސީންގެ ބަޔޯމެޓްރިކް މައުލޫމާތު އަންނަ ނޮވެމްބަރު 15 ވަނަ ދުވަހުގެ ކުރިން އަޕްޑޭޓް ކުރަން ފަހު ފުރުސަތު މިނިސްޓްރީން ދީފައިވާކަމަށް މިނިސްޓްރީން ބުންޏެވެ.
މި މުއްދަތުގައި އެކަށީގެންވާ ސަބަބެއް ނެތި ބަޔޯމެޓްރިކް މައުލޫމާތު އަޕްޑޭޓް ނުކުރާ ބިދޭސީން ޑީޕޯޓް ކުރާނެ ކަމަށާއި، އެ މީހުންނަށް ވަޒީފާދިން ފަރާތްތައް ވަޒީފާއާ ބެހޭ ގާނޫނުގެ ދަށުން 50،000 ރުފިޔާއިން ޖޫރިމަނާކޮށް އިމިގްރޭޝަން ގާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު މިނިސްޓްރީން ދީފައިވެއެވެ. ބަޔޯމެޓްރިކް މައުލޫމާތު އަޕްޑޭޓް ކުރާނީ މާލޭގައި އެންސީއައިޓީ އިމާރާތުގެ ގްރައުންޑް ފްލޯގައި ގާއިމްކޮށްފައިވާ ޖޮކް ސެންޓަރުންނެވެ.
މެއި 2024 ގައި ފެށި "އޮޕަރޭޝަން ކުރަނގި"ގެ ދަށުން ބިދޭސީ މަސައްކަތްތެރިންގެ އިނގިލީގެ ނިޝާނާއި ފޮޓޯ ނަގައި ޑޭޓާބޭސް އަޕްޑޭޓް ކުރުމުގެ މަސައްކަތް ކުރިއަށްދާއިރު، ރައީސް ޑރ. މުއިއްޒު މީގެ ކުރިން ވިދާޅުވެފައިވަނީ މި ޕްރޮގްރާމުން އެނގުނު ގޮތުގައި މިދިޔަ ދެ އަހަރުގެ ތެރޭގައި 178،982 ބިދޭސީން ރާއްޖޭގައި އުޅޭކަން ކަމަށެވެ.
ކޮމެންޓު ފޮނުވާ