ނުފޫޒުގަދަ ގައުމުތަކުން އިސްރާއީލަށް ހިމާޔަތް ދޭނަމަ ބައިނަލްއަގްވާމީ ނިޒާމުތައް ބަލިކަށިވެ އިންސާފު ފަސްވާނެކަމަށް ރައީސް މުއިއްޒު ވިދާޅުވެއްޖެއެވެ.
2023 އޮކްޓޯބަރުން ފެށިގެން ޣައްޒާގައި އިސްރާއީލުން ހިންގަމުންދާ ލާއިންސާނީ އަމަލުތަކާއި، ދުނިޔޭގެ މުޖުތަމައުން އަމަލީ ފިޔަވަޅު ނޭޅުމާ ގުޅޭގޮތުން ވާހަކަ ދައްކަވަމުން، ބައިނަލްއަގްވާމީ ގާނޫނު ހުރިހާ ގައުމުތަކަށް ހަމަހަމައަށް ތަންފީޒުކުރަން ޖެހޭކަން ރައީސް ފާހަގަކުރެއްވިއެވެ. މިހާތަނަށް އިސްރާއީލުގެ ހަމަލާތަކުގައި 67،000 އަށްވުރެ ގިނަ ފަލަސްޠީނު ރައްޔިތުން ޝަހީދުވެފައިވާއިރު، އައިސީޖޭގައި ދެކުނު އެފްރިކާއިން އިސްރާއީލާ ދެކޮޅަށް ހުށަހެޅި ނަސްލު ހަލާކުކުރުމުގެ މައްސަލައިގައި ރާއްޖެ ބައިވެރިވެފައިވެއެވެ.
ރައީސް މުއިއްޒު ވިދާޅުވޫ ޣައްޒާއަށް އިންސާނީ އެހީ ހިފައިގެން ދިޔަ އުޅަނދުތަކަށް އިސްރާއީލުން ދެމުންދާ ހަމަލާތަކަކީ ބައިނަލްއަގުވާމީ ގާނޫނަށް ކުރެވޭ ފުރައްސާރައެއް ކަމަށެވެ. މިދިޔަ ދެ ހަފްތާ ތެރޭ ޣައްޒާއަށް އެހީ ގެންދިޔަ ފްލޮޓިލާގެ އުޅަނދުތައް އިސްރާއީލުގެ ސިފައިން އަރައިގަނެ، މީހުން ހިފަހައްޓައި، ގިނަ ބަޔަކު ޑީޕޯޓްވެސް ކޮށްލައިފިއެވެ.
"ބައިނަލްއަގްވާމީ ގާނޫނު ތައަޢައްސުބުން އެއްކިބާވެ ތަންފީޒު ކުރަންޖެހޭނެ. އެކަމުގައި އިސްތިސްނާއެއް އޮވެގެން ނުވާނެ" ކަމަށް ރައީސް ވިދާޅުވެ، އިސްރާއީލު ޖަވާބުދާރީ ކުރުވަންޖެހޭނީ ދެމެހެއްޓެނިވި ސިޔާސީ ބާރުއެޅުމާއި ދަތިކުރުންތަކުގެ ތެރެއިން ކަމަށް ވިދާޅުވިއެވެ. ނުފޫޒުގަދަ ގައުމުތަކުން އިސްރާއީލު ޖަވާބުދާރީ ކުރުވުމުން ސަލާމަތް ކުރާނަމަ ބައިނަލްއަގްވާމީ ނިޒާމުތައް ބަލިކަށިވެ އިންސާފު ފަސްވާނެކަން ރައީސް ފާހަގަކުރެއްވިއެވެ. އިސްރާއީލް ޕާސްޕޯޓް އޮންނަ މީހުން ރާއްޖެ އެތެރެވުން މަނާކުރަން ނިންމެވީ ހަރުދަނާ ލީޑާޝިޕްގެ މިސާލެއްގެ ގޮތުގައި ކަމަށް ރައީސް ވިދާޅުވެ، އިންސާފާއި މިނިވަންކަން ލިބެންދެން ފަލަސްތީނުގެ ރައްޔިތުންނާއެކު ރާއްޖެއިން ސާބިތުކަންމަތީ ދެމިތިބޭނެކަން ވަނީ ފާހަގަކުރައްވާފައެވެ.
ތުރުކީގެ އަނަދޫލޫ ނޫހަށް ދެއްވި އިންޓަވިއުއެއްގައި ރައީސް ވިދާޅުވީ ރާއްޖެ ފަދަ ކުޑަ ގައުމަކުން އިސްރާއީލާ ދެކޮޅަށް ފިޔަވަޅު އެޅުމަކީ ރަމްޒީ އަމަލަކަށްވުރެ ބޮޑު ކަމެއް ކަމަށާއި، ރާއްޖެ އެކަނި ހުރިކަމުގައިވިޔަސް ރާއްޖޭގެ ސްޓޭންޑް ބަދަލުނުވާނެ ކަމަށެވެ. "ހަގީގީ މިނިވަންކަން މިންކުރެވެނީ ބޮޑުމިނުން ނުވަތަ ބާރުގަދަކަމުން ނޫން. އެހެނެއް ކަމަކު، ބާރުގެ ކުރިމަތީގައި ޒަމީރު ދެމެހެއްޓުމުގެ ގާބިލުކަމުން" ކަމަށް އެމަނިކުފާނު ވިދާޅުވިއެވެ.
ކޮމެންޓު ފޮނުވާ