ފެނަކަ ކޯޕަރޭޝަންގެ ހާއްސަ އޮޑިޓުގެ މަސައްކަތް ލަސްވެގެން ދިޔައީ އެ ކުންފުނިން ގާތްގަނޑަކަށް 3 ބިލިއަން ރުފިޔާގެ މުއާމަލާތްތައް ސިސްޓަމަށް ނާޅައި ފޮރުވައިގެން ހުރުމުން ކަމަށް އޮޑިޓާ ޖެނެރަލް ހުސެން ނިޔާޒީ ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމެޓީގައި ވާހަކަ ދައްކަވަމުން ނިޔާޒީ ހާމަކުރެއްވި ގޮތުގައި 2023 ވަނަ އަހަރު އޮޑިޓު ފެށުމުން ދިމާވި އެންމެ ބޮޑު ހުރަހަކީ ބޮޑެތި އަދަދުތަކުގެ ޕާޗޭސް އޯޑަރުތައް ރެކޯޑު ނުކޮށް ހުރުމެވެ. ރެކޯޑުތައް ރަނގަޅަށް ނުބެލެހެއްޓުމުގެ ސަބަބުން ހާއްސަ އޮޑިޓަށް ބޭނުންވާ މައުލޫމާތު ހޯދުމަށްވެސް ވަނީ ދަތިތަކެއް ކުރިމަތިވެފައެވެ. ފަހުން އާންމުކުރި ހާއްސަ އޮޑިޓު ރިޕޯޓުން ދައްކާ ގޮތުގައި ފެނަކައިން ބީލަމުގެ އުސޫލުން ބޭރުން 1.37 ބިލިއަން ރުފިޔާގެ މަސައްކަތް ހަވާލުކޮށް، ބާޒާރުގެ އަގަށްވުރެ 767 މިލިއަން ރުފިޔާ އިތުރަށް އިންޖީނުގެތައް އެޅުމަށް ހަރަދުކޮށްފައިވެއެވެ.
އޮޑިޓާ ޖެނެރަލް ފާހަގަކުރެއްވި ގޮތުގައި މާލީ އޮޑިޓެއްގެ ނަތީޖާ ގޯސްވުމަކީ އެ ތަނެއްގެ ކޮންޓްރޯލާއި ގަވަނަންސްގެ ނިޒާމު ވަރަށް ބޮޑަށް ދަށްކަން ދައްކައިދޭ ހެއްކެކެވެ. އަދި ހިސާބުތައް ރަނގަޅަށް ބަލަހައްޓައި ޖަވާބުދާރީވުމަކީ ބޭކާރު ހަރަދާއި ކޮރަޕްޝަން ހުއްޓުވުމަށް އެޅޭނެ އެންމެ މުހިންމު ފިޔަވަޅު ކަމަށްވެސް އޭނާ ވިދާޅުވިއެވެ.
ކޮމެންޓު ފޮނުވާ