އޮޑިޓާ ޖެނެރަލްގެ އޮފީހުން ނެރުނު ފެނަކައިގެ ހާއްސަ އޮޑިޓް ރިޕޯޓުން ފާހަގަކުރެވިފައިވާ ކަންބޮޑުވާ ކަމެއްގައި، ބައެއް ކުންފުނިތަކާ މަސައްކަތް ރަސްމީކޮށް ހަވާލުކުރުމުގެ ކުރިންވެސް ފެނަކައިގެ ނަމުގައި ރާއްޖެއިން ބޭރުން 12 މިލިއަން ރުފިޔާ އަށްވުރެ ގިނަ އަގުގެ މުދާ ގެނައިކަން ހާމަވެއްޖެއެވެ. ޖަނަރޭޓަރު ސެޓާއި ކަރަންޓް ކޭބަލް އަދި ޓްރާންސްފޯމަރު ސަޕްލައިކޮށްދޭން ހަވާލުވި ތިން ކުންފުނިން މި ތަކެތި ފެނަކައިގެ ނަމުގައި ރާއްޖެ ގެނައުމުގެ މަސައްކަތް ފަށާފައިވަނީ އެކުންފުނިތަކާ މަސައްކަތް އެވޯޑްކޮށް ހަވާލުކުރުމުގެ ކުރިން ކަމަށް އިމްޕޯޓް ޑިއުޓީއާއި މުދާ ކްލިއާކުރުމުގެ ލިޔުންތަކުން އެނގެއެވެ.
ރިޕޯޓުގައި ފާހަގަކޮށްފައިވާ ގޮތުން ފަސް ކުންފުނިއަކުން މަސައްކަތް އެވޯޑްކުރުމުގެ ކުރިންވެސް މުދާ ޝިޕްކޮށް ބޯޓަށް އަރުވާފައިވާކަން ސާބިތުވެއެވެ. އޮޑިޓުގައި ބުނީ މިކަންވެގެން ދިޔައީ ޕްރޮކިއުމަންޓް އުސޫލުތަކާ ހިލާފަށްކަމަށާއި، ފެނަކައިގެ މުވައްޒަފުންނާއި މުދާ ސަޕްލައި ކުރާ ފަރާތްތަކާ ދެމެދު އޮންނަ ގުޅުމެއްގެ ސަބަބުން މުދާ ސަޕްލައިކުރާ ކުންފުނިތަކަށް މަސައްކަތް ލިބޭނެކަމުގެ ޔަގީންކަން ކުރިން އެބައޮތްކަމަށެވެ. މި މަސައްކަތްތައް ހަވާލުކޮށްފައިވަނީ ވާދަވެރި ބީލަމުގެ އުސޫލުން ބޭރުން ޑައިރެކްޓް ޕާޗޭސިން ކޮމިޓީން ފަރާތްތައް ކަނޑައަޅައިގެންކަމަށްވެސް ރިޕޯޓުގައި ވެއެވެ.
ކޮމެންޓު ފޮނުވާ