ގދ. ރަތަފަންދޫއަށް ނިސްބަތްވާ ފިރިހެނަކާއި ކުޅުދުއްފުށި ސިޓީއަށް ނިސްބަތްވާ ފިރިހެނަކު މަގުމަތީގައި ހުރި އަނބުގަހުން ވަގަށް އަނބު ބިނދެގެން ހައްޔަރުކޮށް، ކްރިމިނަލް ކޯޓުން އިއްޔެ އެމީހުން ހަތް ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ. މި ދެ މީހުންނަށް ވަނީ ވައްކަމުގެ ތުހުމަތު ކޮށްފައެވެ.
ކޯޓުގައި މި ދެ މީހުން ވަނީ އެ އަނބުގަހަކީ މަގުމަތީގައި ހުރި ގަހެއް ކަމަށާއި، އެ ގަހުން އަނބު ބިނުމަކީ މަނާކަމެއް ކަމެއް އެނގިފައި ނުވާ ކަމަށް ބުނެފައެވެ. އެ މީހުން ބުނި ގޮތުގައި އަނބު ބިނނީ ގަހަށް އަރައިގެން ނޫން ކަމަށާއި، ބިންމަތީގައި ހުރެގެން އަތް ލެވޭ ވަރަށް އަނބުތައް ހުރުމުން ކަމަށެވެ. އަދި ދެ މީހުން ވެސް ބިނދީ ހަތަރު އަނބު ކަމަށް ވެސް އެ މީހުން ވަނީ ބުނެފައެވެ.
ނަމަވެސް ކޯޓު އަމުރުގައި ފާހަގަކޮށްފައިވަނީ، މި މައްސަލައިގައި ތުހުމަތުކުރެވޭ މިންވަރެއްގެ ހެކި ހުށަހަޅާފައިވާ ކަމަށެވެ. ހުށަހެޅި ހެކިތަކުގެ ތެރޭގައި ހިމެނެނީ، ހާދިސާގެ ސީނަށް ދިޔަ ފުލުހެއްގެ ރިޕޯޓެވެ. އެ ރިޕޯޓުގައި ބުނެފައިވަނީ، ހާދިސާ ހިނގި ވަގުތު އެތަނުން އެކަކު އޮތީ އަނބުގަހުގައި ކަމަށާއި، އަނެއް މީހާ ހުރީ އަނބު ހޮވަން ކަމަށެވެ. މިއީ ދެ މީހުން ކޯޓުގައި ދިން ބަޔާނާ ތަފާތު އެކެވެ.
ކޯޓު އަމުރުން އިތުރަށް އެނގެނީ، މި މައްސަލައިގައި ހައްޔަރުކުރި ދެ މީހުންނަކީ ވެސް މީގެ ކުރިން ބަންދުކޮށްފައިވާ ކުށުގެ ރިކޯޑު އޮތް މީހުން ކަމަށެވެ. މީގެ ކުރިން ވެސް ގަސްގަހުން އަނބު ނުވަތަ އެހެނިހެން މޭވާ ވަގަށް ބިނދެގެން ހައްޔަރުކުރި މައްސަލަތައް ފެންމަތިވެފައި އެބަހުއްޓެވެ.
ކޮމެންޓު ފޮނުވާ