ރާއްޖޭގެ ހަމަޖެހުން ނަގާލުމަށް މަސައްކަތްކުރާ ކުރީގެ ރައީސުންގެ އިނާޔަތްތައް ކަނޑާލަން ޖެހޭނެކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ. މިނިސްޓަރ ވިދާޅުވީ އޮފީސް ހަރަދުތަކާއި ހަށިފާރަވެރިންގެ ގޮތުގައި ކުރީގެ ރައީސުންނަށް ލިބިފައިވާ އިނާޔަތްތައް އެކުލެވޭ ގޮތަށް އެ އިނާޔަތްތައް ކަނޑާލަން ޖެހޭ ކަމަށެވެ.
މި ވާހަކަތައް މިނިސްޓަރ ދައްކަވާފައިވަނީ އިދިކޮޅު އެމްޑީޕީން ރޭ ކުރިޔަށްގެންދިޔަ "ލޫޓުވާލައިފި" އެއްވުމުގައި ހިނގި ހާދިސާތަކާ ގުޅިގެންނެވެ. ފުލުހުންނާއި އެކުވީ އެއްބަސްވުމާއި ހިލާފަށް މަޖީދީމަގުން ކުރިޔަށްދާން މަސައްކަތް ކުރުމުން ފުލުހުން ވަނީ މަގު ބަންދުކޮށް އަމީނީމަގުން ހިނގާލުން ކުރިޔަށްގެންދިއުމަށް ތަކުރާރުކޮށް ނަސޭހަތްތެރިވެފައެވެ. މި އެއްވުމުގައި ކުރީގެ ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް އަބްދުﷲ ޝާހިދު އަދި ޗެއާޕާސަން ފައްޔާޒް އިސްމާއިލްގެ އިތުރުން އެމްޑީޕީގެ އިސްވެރިން ބައިވެރިވެވަޑައިގެންނެވިއެވެ.
އެއްވުން ހޫނުވެގެން ފުލުހުން ވަނީ ޕެޕާ ސްޕްރޭ ބޭނުންކުރުމަށްފަހު ބާރުގަދަ އެލާމެއްވެސް ބޭނުންކޮށްފައެވެ. މިއީ ލޯންގް ރޭންޖް އެކޫސްޓިކް ޑިވައިސް ނަމަކަށް ކިޔާ އަދި މުޒާހަރާތައް ކޮންޓްރޯލް ކުރުމަށް ބޭނުންކުރާ ނޮން-ލީތަލް ވަސީލަތެކެވެ. މިކަމާ ގުޅިގެން ކުރީގެ ރައީސް ސޯލިހު ވަނީ މިއީ ހާލަތާއި ނުބައްދަލު ބާރުގެ ބޭނުންކުރުމެއްކަމަށް ބުނެ ސޯޝަލް މީޑިއާގައި ވިދާޅުވެފައެވެ.
މި ޕޯސްޓަށް ރައްދު ދެއްވައި މިނިސްޓަރ ސައީދު ވަނީ އެމްޑީޕީގެ ވެރިކަން ހަނދާނަށް ގެނައުމަށް ގޮވާލައްވާފައެވެ. މިނިސްޓަރ ވިދާޅުވީ ކުއްލިގޮތަކަށް މާ ޑިމޮކްރަސީއަށް ތާއީދުކޮށް ޑިމޮކްރަސީ ގަބޫލުކުރާކަމަށް ރައީސް ސޯލިހު ރައްޔިތުންނަށް ދައްކަވަން މަސައްކަތް ކުރައްވިނަމަވެސް ހަގީގީ މަންޒަރަކީ އެއީ ނޫންކަމަށެވެ. މިނިސްޓަރ ފާހަގަކުރެއްވީ މާލެފަދަ ޓްރެފިކަށް ބާރުބޮޑު ތޮއްޖެހިފައިވާ ސިޓީއެއްގައި އާންމު ޖާގަތައް ވަރަށް މަދުކަމަށާއި އެމްޑީޕީގެ ސަރުކާރު ހިމެނޭގޮތަށް އެހެން ސަރުކާރުތަކުން އެއްވުންތައް ކުރިޔަށްގެންދަން ވަކި ސަރަހައްދެއް ކަނޑައެޅީ އެ ސަބަބާހުރެކަމަށެވެ.
މީގެއިތުރުން މިނިސްޓަރ ވިދާޅުވީ މުޒާހަރާތަކާއި އެއްވުންތައް ކުރިޔަށްގެންދިއުމުގައި އަމަލުކުރަން ޖެހޭ ގޮތުގެ އުސޫލަށް އެމްޑީޕީގެ ވެރިކަމުގައި ތާއީދުކުރިކަމަށެވެ. ގާނޫނާއި ހިލާފަށް އެއްވުން ކުރިޔަށްގެންދިއުމަށް ޖާގަ ނުދިނުމަކީ އެއީ އަނިޔާވެރިވުމެއް ނޫންކަމަށާއި މިއީ އާބާދީ ބޮޑެތި ސަރަހައްދުތަކުގައި އާންމު ބުއްދިން ނިންމާނެ ނިންމުންތަކެއްކަމަށް މިނިސްޓަރ ސައީދު ވިދާޅުވިއެވެ.
ފުލުހުންނާއި އެކުވީ އެއްބަސްވުމާއި އެމްޑީޕީ ހިލާފުވިކަން ހަގީގަތެއްކަމަށް ބުނެ މިނިސްޓަރ ވިދާޅުވީ ފުލުހުން މަސައްކަތްކުރީ ޒިންމާދާރުކޮށްކަމަށާއި އެ ހަގީގަތާވެސް ކުރިމަތިލާން ޖެހޭކަމަށެވެ. އާންމު ރައްޔިތުންގެ ރައްކާތެރިކަމާއި ސުލްހަވެރިކަމާއެކު އެއްވެ އުޅުމުގެ ހައްގާއި ދެމެދު ހަމަހަމަކަން ގެނައުމަށް ފުލުހުން މަސައްކަތްކުރިކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ސައީދު ފާހަގަކުރެއްވީ ކުރީގެ ރައީސުންނަކީ ރައްޔިތުންނަށް ޒިންމާދާރުކަމާއެކު މައުލޫމާތު ފޯރުކޮށްދޭ ބަޔަކަށް ވާން ޖެހޭކަމަށާއި އެބޭފުޅުން ދޮގު ހަބަރު ފެތުރުމާއި ހަލަބޮލިކަމަށް ހިތްވަރުދިނުމާއި ދުރުވާން ޖެހޭކަމަށެވެ. މިފަދަ ދޮގުތައް ކުރީގެ ރައީސުން ތަކުރާރުކޮށް ފަތުރަމުންގެންދާނަމަ އެބޭފުޅުންނަށް ކުރީގެ ރައީސުންގެ ގޮތުގައި ލިބޭ އިނާޔަތްތައް ކަނޑާލަން ޖެހޭކަމަށް މިނިސްޓަރ ސައީދު ވިދާޅުވިއެވެ. މިނިސްޓަރ ވަނީ ރައީސް ސޯލިހު ކަނޑައެޅިގެން އިތުރުފުޅު ހައްދަވައިރު ފުލުހުންގެ އަގު ނުވެއްޓޭގޮތަށް ވާހަކަ ދައްކަވަން ގޮވާލައްވާފައެވެ.
ކޮމެންޓު ފޮނުވާ