ރޭ ބޭއްވި މުޒާހަރާގެ ތެރެއިން އަށް މީހަކު ހައްޔަރުކޮށްފައިވާ ކަމަށް އެމްޑީޕީން ހާމަކޮށްފައިވެއެވެ. މި ބައިވެރިން ހައްޔަރުކޮށްފައިވަނީ ހަމަނުޖެހުން ހިންގައި، ފުލުހުންގެ މަސައްކަތަށް ހުރަސްއެޅި ކަމަށް ބުނެ ކަމަށް އެ ޕާޓީން ބުންޏެވެ. ނަމަވެސް އެ މީހުން ވަގުތުން ދޫކޮށްލުމަށް އެމްޑީޕީން ވަނީ ގޮވާލައިފައެވެ.
ފުލުހުންގެ ބެލުމުގެ ދަށަށް ގެންދިޔަ މުޒާހަރާގެ ބައިވެރިންގެ ތެރޭގައި މާފުށީ ކައުންސިލްގެ ރައީސް ހަސަން ސޮލާހުއާއި، ރައްޔިތުންގެ މަޖިލީހުގެ ކުރީގެ މެންބަރުން ޔާސިރު އަބްދުއްލަތީފާއި ޔައުގޫބު އަބްދުﷲ އާއި، އައްޑޫ ސިޓީ ހިތަދޫ ރަސްގެދަރަ ދާއިރާގެ ކައުންސިލަރ ހުސައިން ޒަރީރު ހިމެނެއެވެ. މީގެ އިތުރުން އިތުރު ތިން މީހަކު ވެސް ހައްޔަރުކޮށްފައިވާ ކަމަށް އެމްޑީޕީން ބުނެއެވެ.
މި މުޒާހަރާ ހަލަބޮލިކޮށްލުމަށް މަސައްކަތްކޮށްފައިވަނީ ފުލުހުން ކަމަށް އެމްޑީޕީން ތުހުމަތުކުރެއެވެ. އެ ޕާޓީން ބުނީ ސުލްހަވެރިކަމާއެކު ކުރިއަށް ގެންދިއުމަށް ރާވާފައިވާ މުޒާހަރާ އަށް، ފުލުހުން ގިނަ އަދަދެއްގެ ޕެޕާ ސްޕްރޭ ޖަހާފައިވާ ކަމަށާއި، އޭގެ ސަބަބުން މުޒާހަރާގެ ބައިވެރިންނާއި ނޫސްވެރިންނަށް ވެސް އަސަރުކޮށްފައިވާ ކަމަށެވެ. ހައްޔަރުކުރި މީހުންނަށް ގާނޫނީ ވަކީލެއްގެ ހައްގު ފުލުހުން ނުދޭ ކަމަށް އެމްޑީޕީގެ ގާނޫނީ ވަކީލުންގެ ޓީމުން ބުނެފައިވެއެވެ. މުޒާހަރާ ނިންމާލީ ދަންވަރު 12:00 ޖެހިފަހުންނެވެ.
ކޮމެންޓު ފޮނުވާ