"ލޫޓުވައިފި" ނަމުގައި މިރޭ މޯލްޑިވްސް ޑިމޮކްރެޓިކް ޕާޓީ (އެމްޑީޕީ)އިން ކުރިޔަށް ގެންދިޔަ މުޒާހަރާގައި ޤާނޫނާ ޚިލާފު އަމަލުތައް ހިންގި ފަރާތްތަކާމެދު ޤާނޫނީ ފިޔަވަޅުތައް އަޅާނެ ކަމަށް މޯލްޑިވްސް ޕޮލިސް ސަރވިސްއިން ވިދާޅުވެއްޖެއެވެ.
ފުލުހުންގެ ބަޔާނުގައި ވިދާޅުވީ، މުޒާހަރާގެ ބައިވެރިންނަށް ކަނޑައެޅި ހުއްދަ ދީފައިވާ ރޫޓާ ޚިލާފަށް މަޖީދީމަގުން ދަތުރުކުރަން ފެށި ކަމަށާއި، މިކަން ނުކުރުމަށް ފުލުހުން ތަކުރާރުކޮށް ނަސޭހަތްތެރިވެ އިންޒާރުވެސް ދިން ކަމަށެވެ.
އެހެންނަމަވެސް، މުޒާހަރާގެ ބައެއް ބައިވެރިން ފުލުހުންގެ އިންޒާރުތަކަށް އެއްވެސް ސަމާލުކަމެއް ނުދީ، ފުލުހުންނާ ދިމާލަށް ގަލާއި ފެންފުޅިތައް އުކާލައި، ފުލުހުން ބޭނުންކުރާ އާލާތްތައް އަތުލުމަށް މަސައްކަތްކުރި ކަމަށް ފުލުހުން ހާމަކުރެއެވެ. މީގެ އިތުރުން، ފުލުހުންގެ ވާޖިބު އަދާކުރުމަށް ހުރަސްއެޅޭ ގޮތަށް އެކި އަމަލުތައް ހިންގި ކަމަށްވެސް ފުލުހުން އިތުރަށް ވިދާޅުވިއެވެ.
މިފަދަ ޤާނޫނާ ޚިލާފު އަމަލުތައް ހިންގި ފަރާތްތަކާމެދު ތަޙުޤީޤުކޮށް، ޤާނޫނީ ފިޔަވަޅުތައް އެޅުމުގެ މަސައްކަތް ކުރިޔަށް ގެންދާނެ ކަމަށް ފުލުހުން ބުނެއެވެ. އަދި އާންމުންނަށް އަމާޒުކޮށް، ފުލުހުންގެ ވާޖިބު އަދާކުރުމަށް އެއްވެސް ގޮތަކުން ހުރަސްނޭޅުމަށް ނަސޭހަތްތެރިވެ، ޤާނޫނާ އެއްގޮތަށް އަމަލުކުރުމަށް އިލްތިމާސްކުރާ ކަމަށް ފުލުހުން ވިދާޅުވިއެވެ.
ކޮމެންޓު ފޮނުވާ