ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ މާލޭގެ ވަރުނުލާ ރާޅުގަނޑު ސަރަޙައްދުގައި ޤާއިމުކުރަމުންދާ ނޭޝަނަލް ސަރފިންގ ސްޓޭޑިއަމްގެ މަސައްކަތްތައް ކުރިއަށްދާ ގޮތް ބައްލަވާލައްވާފައެވެ.
ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަޑައިގެންނެވި ހާލުގައި، އިއްޔެ ހަވީރު އެ ސަރަޙައްދަށް ރައީސުލްޖުމްހޫރިއްޔާ ކުރެއްވި ޒިޔާރަތުގައި، ސްޓޭޑިއަމްގެ މަސައްކަތް ކުރިއަށްދާ މިންވަރާއި، މަޝްރޫޢުގެ ތަފްސީލުތަކާ ގުޅޭ އަދާހަމަ މަޢުލޫމާތު ހޯއްދަވައިފިއެވެ.
ބައިނަލްއަޤުވާމީ މިންގަނޑުތަކާ އެއްގޮތަށް ތަރައްޤީކުރަމުންދާ މި ސްޓޭޑިއަމްގައި ހިމެނޭނީ ކުޅިބަލާ ފަރާތްތަކަށް ޚާއްޞަކުރެވިފައިވާ ސަރަޙައްދުތަކާއި، ރޮސްޓްރަމް، މީޑިއާއަށް ޚާއްޞަކުރެވިފައިވާ ތަންތަން، ކޮމެންޓްރީ ބޮކްސް، ކެމެރާ ބޭނުންކުރުމަށް ޚާއްޞަ ޑެކްތައް، އޮބްޒަރވޭޝަން ކޯނަރުތައް، ޖިމް، ޓެރަސް، ގިނަ ބޭނުންތަކަކަށް ބޭނުންކުރެވޭނެ ހޯލް، ކޮންފަރަންސް ރޫމް އަދި އެހެނިހެން ޒަމާނީ ވަސީލަތްތަކެވެ.
މި މުހިންމު މަޝްރޫޢު ނިމުމާއެކު ރާއްޖޭގައި ރާޅާއެޅުމުގެ ބައިނަލްއަޤުވާމީ މުބާރާތްތައް ބޭއްވުމަށް ބޭނުންވާ އެންމެހައި ވަސީލަތްތައް ލިބިގެންދާނެއެވެ. މިއީ ދިވެހިރާއްޖޭގައި މޫދު ކުޅިވަރުގެ ދާއިރާ ކުރިއަރުވައި، ބައިނަލްއަޤުވާމީ ފެންވަރަށް މި ކުޅިވަރު ތަރައްޤީކުރުމަށް ފަހިވާނެ މުހިންމު ފިޔަވަޅެކެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން ކުޅިވަރާއި ހަށިހެޔޮކަމުގެ ދާއިރާއަށް ދެއްވަމުންދާ ޚާއްޞަ އިސްކަމުގެ ތެރެއިން، މާލޭގެ ރާޅުގަނޑު ސަރަޙައްދުގައި ބައިނަލްއަޤުވާމީ ފެންވަރުގެ ސަރފިންގ ސްޓޭޑިއަމެއް ޤާއިމުކުރުމަކީ ރައީސުލްޖުމްހޫރިއްޔާގެ މުހިންމު ވަޢުދުފުޅެއް ކަމުގައި ފާހަގަކުރެވެއެވެ.
ކޮމެންޓު ފޮނުވާ