ފަތުރުވެރިކަން ތަރައްގީކުރުމުގައި ދިވެހި ސަގާފަތް ރައްކާތެރިކުރުމަށް ރައީސް ގޮވާލައްވައިފި

ރާއްޖޭގެ ފަތުރުވެރިކަމުގެ ސިނާއަތް ކުރިއެރުވުމުގައި ދިވެހި އާދަކާދަތަކާއި ސަގާފަތް ދަމަހައްޓައިގެން ކުރިއަށްދިއުމުގެ މުހިންމުކަން ފާހަގަކުރައްވާ، ދިވެހި ސަގާފަތް ރައްކާތެރިކުރުމަށް، ގައުމީ ފަތުރުވެރިކަމުގެ ދުވަހުގެ މުނާސަބަތުގައި ކުރެއްވި އެކްސްޕޯސްޓެއްގައި  ރައީސް ޑރ. މުހައްމަދު މުއިއްޒު ގޮވާލައްވައިފިއެވެ.

އެކްސް (ޓްވިޓަރ) ގައި މިއަދު ކުރެއްވި ޕޯސްޓެއްގައި ރައީސް ވިދާޅުވީ ފަތުރުވެރިކަމުގެ ދާއިރާގެ އިހާއި މިހާރުގެ މަސައްކަތްތެރީންނަށް ޝުކުރު އަދާކުރައްވާ ކަމަށެވެ. އަދި ރާއްޖޭގެ ފަތުރުވެރިކަން އިތުރަށް ކުރިއެރުވުމުގައި ގުދުރަތީ ރީތިކަމާއި ގައުމުގެ އަމާންކަމާއި ދިވެހީންގެ ރީތި އާދަކާދަތައް ހިމާޔަތްކޮށްގެން ކުރިއަށްދިއުމަށް މި ސިނާއަތުގައި ހަރަކާތްތެރިވާ އެންމެހައި ފަރާތްތަކަށް އިލްތިމާސްކުރައްވާ ކަމަށް ވިދާޅުވިއެވެ.

މި ސަރުކާރުން ފަތުރުވެރިކަމުގެ ސިނާއަތް ފުޅާކުރުމަށް ކުރަމުންދާ މަސައްކަތްތަކުގެ ތެރޭގައި، ފަތުރުވެރިކަން ނެތް އަތޮޅުތަކުގައި މި ސިނާއަތް ފެށުމާއި ތަރައްގީކުރުމުގެ މަސައްކަތްތައް ހިމެނެއެވެ. މީގެ އިތުރުން ކޮވިޑް-19 ޕެންޑަމިކްގެ ސަބަބުން 2020 ވަނަ އަހަރު ބަންދުކުރި އައްޑޫ ސިޓީގެ ޝަންގްރިލާ ރިސޯޓް އަލުން ހުޅުވުމަށް ވެސް މަސައްކަތް ކުރަމުންދާ ކަމަށާއި، މިއަހަރު ނިމުމުގެ ކުރިން އެ ރިސޯޓް ހުޅުވުމަކީ ސަރުކާރުގެ އަމާޒުކަމަށް ވަނީ ބަޔާންކުރައްވައިފައެވެ.

އައްޑޫ ސިޓީގެ ހަންކެޑެގައި އާ ފަތުރުވެރިކަމުގެ މަޝްރޫއެއް ތަރައްގީކުރުމަށް ރައީސް ނިންމެވުމާ ގުޅިގެން، އެ ސަރަހައްދު ފަތުރުވެރިކަމަށް ތަރައްގީކުރުމުގެ މަސައްކަތް އަވަސްކުރުމަށްޓަކައި 2021 ވަނަ އަހަރު މޯލްޑިވްސް ފަންޑް މެނޭޖްމަންޓް ކޯޕަރޭޝަނަށް ކުއްޔަށް ދިނުމަށް ނިންމި ގަރާރު އުވައިލައިފައިވާ ކަމަށް ވެސް ވަނީ އިއުލާންކުރައްވައިފައެވެ.

ޓޫރިޒަމް މިނިސްޓަރު އިބްރާހީމް ފައިސަލް (ތޯރިގު) އިއްޔެ ވިދާޅުވިގޮތުގައި، ހަންކެޑެ އިންޓަގްރޭޓެޑް ޓޫރިޒަމް މަޝްރޫއެއްގެ ގޮތުގައި ތަރައްގީކުރުމަށް ބޭނުންވާ ކަންކަން ދިރާސާކޮށް، ބީލަމުގެ އުސޫލުން އެ މަސައްކަތް ކުރިއަށްގެންދިއުމަށް މިނިސްޓްރީން ތައްޔާރުވަމުންދެއެވެ. މިނިސްޓަރު ވިދާޅުވި ގޮތުގައި ހަންކެޑެ ތަރައްގީކުރުމުގެ އަމަލީ މަސައްކަތް މިއަހަރު ތެރޭގައި ފަށައި، ރައީސްގެ މި ދައުރުގައި އޮޕަރޭޝަނަށް ގެނައުމަކީ އަމާޒެވެ.

މީގެ އިތުރުން އައްޑޫ ސިޓީގެ ދޮންހެރަ ސަރަހައްދު "ހަލާލް ޓޫރިޒަމް" ތަރައްގީކުރުމަށް ބީލަމަށް ހުޅުވާލުމަށް ވެސް ވަނީ ނިންމައިފައި ކަމަށް ތޯރިގު ހާމަކުރެއްވިއެވެ. މިއީ ރާއްޖޭގެ ފަތުރުވެރިކަމުގެ ސިނާއަތަށް އާ ދިމާލެއް ދިނުމާއި، ތަފާތު ބާވަތުގެ ފަތުރުވެރިކަން ތަރައްގީކުރުމަށް ސަރުކާރުން ކުރަމުންދާ މަސައްކަތުގެ ބައެއްކަމަށް ވެސް ވަނީ ފާހަގަކުރައްވައިފައެވެ.