ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑޮކްޓަރ މުޙައްމަދު މުޢިއްޒު މިއަދު ވަނީ ދިވެހި ވަޠަނީ ޚިދުމަތް ރަސްމީކޮށް އިފްތިތާޙުކުރައްވާފައެވެ. ޅ. މާފިލާފުށީގައި ޤާއިމުވެފައިވާ ދިވެހި ޤައުމީ ދިފާޢީ ބާރުގެ ކޮމްޕޮސިޓް ޓްރެއިނިންގ ސެންޓަރުގައި ބޭއްވުނު ޚާއްޞަ ރަސްމިއްޔާތެއްގައި ރައީސުލްޖުމްހޫރިއްޔާ ދިވެހި ވަޠަނީ ޚިދުމަތުގެ ދިދަ ހަވާލުކުރެއްވުމާއެކު މި ޚިދުމަތް ރަސްމީކޮށް ފެށިގެން ދިޔައެވެ.
ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ޤައުމުގެ ފުރިހަމަ ތަރައްޤީ ޙާޞިލުވާނީ ހަރުދަނާ ޒުވާން ޖީލެއް ބިނާކުރެވިގެންނެވެ. ޤައުމާއި ދީނަށް ލޯބިކުރާ، ފަޚުރުވެރި އަދި ހުނަރުވެރި ޒުވާނުން ބިނާކުރުމަކީ ބޮޑެތި ޢުމްރާނީ މަޝްރޫޢުތަކަށް ވުރެ މުހިންމު ކަމެއްކަމަށް އެމަނިކުފާނު ވިދާޅުވިއެވެ.
ތަމްރީނުގައި ބައިވެރިވާ ޒުވާނުންނަށް އެމަނިކުފާނު ކުރެއްވި އިލްތިމާސަކީ، މި ތަމްރީނު ޕްރޮގްރާމަކީ އެމީހުންގެ މުސްތަޤުބަލު އުޖާލާކޮށް އުފާފާގަތިކަން ކަށަވަރުކުރުމަށް ލިބުނު ފުރުޞަތެއްކަމުގައި ބަލައިގަނެ ކުރިއަށް ދިއުމަށެވެ. ތަމްރީނު ފުރިހަމަވުމުން ތައްޔާރުވެގެން ނުކުންނާނީ އުޅުންހުރި، ޤައުމީ ރޫޙާއި ދީނީ ލޯތުބުން ފުރިގެންވާ ބާރުވެރި ޒުވާނުންތަކެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
ދިވެހި ވަޠަނީ ޚިދުމަތުގެ މަޤްޞަދަކީ ދިވެހި ޤައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫޙާނީ އަދި ނަފުސާނީ ގޮތުން ދުޅަހެޔޮ ދިވެހި ރައްޔިތުން ބިނާކުރުމެވެ. މިއަދު ފެށުނު ނޭޝަނަލް ސަރވިސް އިނީޝިއަލް ތަމްރީނު ޕްރޮގްރާމަކީ ތިން މަސް ދުވަހުގެ މައްޗަށް ބިނާކުރެވިފައިވާ ޕްރޮގްރާމެކެވެ.
މި ތަމްރީނު ޕްރޮގްރާމުގައި ދިވެހި ޤައުމިއްޔަތު، ޒިންމާދާރު ރައްޔިތުކަން، ދީނީ ތަޢުލީމު، ލީޑަރޝިޕް އަދި ބަހުގެ ޕްރޮފިޝަންސީ އުނގަންނައިދިނުމުގެ އިތުރުން ކަސްރަތާއި ހަށިހެޔޮކަމާއި ހެވިކަމުގެ ތަމްރީނުތައް ހިމެނިފައިވާނެއެވެ. މީގެ އިތުރުން ފަސްޓް އެއިޑް، ފަޔަރ ފައިޓިންގ އަދި ސެލްފް ޑިފެންސް ފަދަ މުހިންމު ހުނަރުތައް ވެސް ދަރިވަރުންނަށް ދަސްކޮށްދޭނެއެވެ.
މި ތާރީޚީ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުގެ އިތުރުން ދައުލަތުގެ ޢިއްޒަތްތެރިން، ވަޒީރުން، ސަރުކާރުގެ އިސްބޭފުޅުންނާއި ޤައުމީ ދިފާޢީ ބާރުގެ އިސް އޮފިސަރުން ބައިވެރިވެވަޑައިގަތެވެ.
ކޮމެންޓު ފޮނުވާ