ޤައުމުގެ ތަރައްޤީއަށް ބޮޑެތި އިމާރާތްތައް އެޅުމަށްވުރެ ހުނަރުވެރި ޒުވާނުން ބިނާކުރުން މުހިންމުކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ. ޅ. މާފިލާފުށީގައި ހުންނަ ދިވެހި ޤައުމީ ދިފާޢީ ބާރުގެ ކޮމްޕޮސިޓް ޓްރެއިނިން ސެންޓަރުގައި މިއަދު ބޭއްވުނު ރަސްމިއްޔާތެއްގައި ވާހަކަފުޅުދައްކަވަމުން އެމަނިކުފާނު ވިދާޅުވީ، ފަންސާސް ބުރީގެ އިމާރާތެއް އިމާރާތްކުރުމަށްވުރެ ވެސް ޤައުމު ދެކެ ލޯބިވާ، އިސްލާމްދީނަށް ލޯބިކުރާ، ފަޚުރުވެރި، ހުނަރުވެރި ޒުވާނެއް ބިނާކުރުމަކީ މާ މުހިންމު ކަމެއްކަމަށެވެ.
މި ރަސްމިއްޔާތުގައި ވަނީ ގައުމީ ޚިދުމަތުގެ ޕްރޮގްރާމް 340 ޒުވާނުންނާއެކު ރަސްމީކޮށް ފަށައިފައެވެ. ރައީސް ވިދާޅުވީ ޤައުމުގެ ފުރިހަމަ ތަރައްޤީ ޙާޞިލުކުރެވޭނީ ހަރުދަނާ ޒުވާން ޖީލެއް ބިނާކޮށްގެންކަމަށެވެ.
ތަމްރީނުގެ ބައިވެރިންނަށް މުޚާޠަބުކުރައްވަމުން ރައީސް ވިދާޅުވީ މި ފުރުޞަތަކީ އެ ޒުވާނުންގެ މުސްތަޤުބަލު އުޖާލާކޮށް، އުފާފާގަތިކަން ކަށަވަރުކުރުމަށް ލިބުނު ފުރުޞަތެއްކަމަށެވެ. އަދި ތަމްރީނު ނިމުމުން އުފެދިގެންދާނީ އުޅުންހުރި، ޤައުމީ އަދި ދީނީ ލޯބި އަށަގެންފައިވާ ބާރުވެރި ޒުވާނުންތަކެއް ކަމަށް އެމަނިކުފާނު ފާހަގަކުރެއްވިއެވެ.
މި ރަސްމިއްޔާތުގައި ރައީސް ވަނީ ދިވެހި ވަޠަނީ ޚިދުމަތް އިފްތިތާޙުކުރެއްވުމުގެ ގޮތުން ދިވެހި ވަޠަނީ ޚިދުމަތުގެ ދިދަ ހަވާލުކުރައްވައިފައެވެ. ދިވެހި ވަޠަނީ ޚިދުމަތުގެ މިޝަނަކީ ދިވެހި ޤައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫޙާނީ އަދި ނަފުސާނީ ގޮތުން ދުޅަހެޔޮ ދިވެހި ރައްޔިތުން ބިނާކުރުމެވެ.
ނޭޝަނަލް ސާވިސް އިނީޝިއަލް ތަމްރީނަކީ ތިން މަސް ދުވަހުގެ ޕްރޮގްރާމެކެވެ. މި ތަމްރީނު ޕްރޮގްރާމުގައި ދިވެހި ޤައުމިއްޔަތު، ޒިންމާދާރު ރައްޔިތުކަން، ދީނީ ތަޢުލީމު، ލީޑަރޝިޕް އަދި ބަހުގެ ޕްރޮފިޝަންސީ އުނގަންނައިދިނުމުގެ އިތުރުން، ކަސްރަތާއި ހަށިހެޔޮކަމާއި ހެވިކަމުގެ ތަމްރީނުތައް ހިމެނޭނެއެވެ. މީގެއިތުރުން ފަސްޓް އެއިޑް، ފަޔާފައިޓިން އަދި ސެލްފް ޑިފެންސް ފަދަ މުހިންމު ހުނަރުތައް ވެސް ބައިވެރިންނަށް ދަސްކޮށްދޭނެއެވެ.
ކޮމެންޓު ފޮނުވާ