މާލޭގެ ބާޒާރުމަތީ މަސްމާރުކޭޓު ކައިރީގައި ހުންނަ ލިލީ އެފްއެންޑްބީ ސަޕްލަޔާޒް ފިހާރައިގައި ރޭ ރޯވި އަލިފާނުގައި އެތަނުގައި ހުރި މުދަލަށް ބޮޑެތި ގެއްލުންތަކެއް ލިބި، ފިހާރައިގެ ފުރާޅުގެ ބައެއް ވެއްޓިފައިވާކަން އެމްއެންޑީއެފުން ހާމަ ކޮށްފިއެވެ.
ރޭ 1:00 ގައި އެމްއެންޑީއެފް ފަޔާ އެންޑް ރެސްކިޔު ސާވިސްއަށް މި ހާދިސާގެ މައުލޫމާތު ލިބުމުން، ފަޔާފައިޓަރުން ވަގުތުން އެ ސަރަހައްދަށް ގޮސް އަލިފާން ނިއްވާލުމުގެ މަސައްކަތް ފެށިއެވެ. ފަޔާފައިޓަރުންގެ ބުރަ މަސައްކަތުން 2:39 ގައި އަލިފާން ފުރިހަމައަށް ނިއްވާލެވުނެވެ.
މި ހާދިސާގައި އަލިފާން ނިއްވުމުގެ މަސައްކަތުގައި ހަރަކާތްތެރިވި ފަޔާފައިޓަރަކު ހާލުދެރަވުމުން، އޭނާ ސެނަހިޔާ މިލިޓަރީ ހޮސްޕިޓަލަށް ގެންދެވުނު ކަމަށް އެމްއެންޑީއެފުން މައުލޫމާތު ދެއްވިއެވެ. އެހެންނަމަވެސް އޭނާގެ ހާލަތު ކުއްލި ނޫންކަމަށް ވިދާޅުވިއެވެ.
އެމްއެންޑީއެފުން ވިދާޅުވި ގޮތުގައި، މި ހާދިސާގައި އެހެން އެއްވެސް މީހަކަށް އަނިޔާއެއް ލިބިފައެއް ނުވެއެވެ. ނަމަވެސް ފިހާރައިގައި ހުރި ގިނަ އަދަދެއްގެ މުދަލަށް ގެއްލުންވެފައިވާ އިރު، އަލިފާނުގެ ސަބަބުން ފިހާރައިގެ ފުރާޅުގެ ބައެއް ވެސް ވަނީ ވެއްޓިފައެވެ.
ކޮމެންޓު ފޮނުވާ