ފެނަކަ ކޯޕަރޭޝަންއިން އެ ކުންފުނިން ރަށްރަށުގައި ހިންގި މަޝްރޫޢުތަކުގެ ނަމުގައި 26 މިލިއަން ރުފިޔާ މުވައްޒަފުންގެ އަމިއްލަ އެކައުންޓުތަކަށް ޖަމާކުރުމާއި ނަގުދު ފައިސާގެ ގޮތުގައި ދޫކޮށްފައިވާކަން އެ ކުންފުނީގެ 2021 އިން 2023 އަށް ހިނގި އޮޑިޓް ރިޕޯޓުން ހާމަވެއްޖެއެވެ.
މި ފައިސާގެ ތެރެއިން 21 މިލިއަން ރުފިޔާ ފޮނުވާފައިވަނީ ކުންފުނީގެ މުވައްޒަފުންގެ އަމިއްލަ އެކައުންޓުތަކަށް ކަމަށާއި، 5.1 މިލިއަން ރުފިޔާ ނަގާފައިވަނީ ނަގުދު ފައިސާގެ ގޮތުގައި ކަމަށް އޮޑިޓް ރިޕޯޓުގައި ބުނެފައިވެއެވެ. މި ފައިސާގެ ބޮޑު ބައެއް ޖަމާކޮށްފައިވަނީ ރަށްރަށުގައި ޕްރޮޖެކްޓުތައް ހިންގުމަށް ވަގުތީ ގޮތުން ނަގާފައިވާ ޕްރޮޖެކްޓް މެނޭޖަރުންގެ އެކައުންޓްތަކަށް ޕެޓީ ކޭޝްގެ ނަމުގައެވެ.
އޮޑިޓް އޮފީހުން ފާހަގަކުރިގޮތުގައި، ޕެޓީ ކޭޝް ރީއިމްބާސް ކުރުމަށް ހުށަހަޅާ ރިޕޯޓުތަކުގައި ހިމެނޭ ހަރަދުތަކަކީ ކުންފުނީގެ ބޭނުމަށް ކޮށްފައިވާ ހަރަދުތައްކަން ކަށަވަރުކުރެވޭނެ އެއްވެސް އިންތިޒާމެއް ނެތެވެ. މީގެ ސަބަބުން މި ފައިސާ އަމިއްލަ ބޭނުންތަކަށް ބޭނުންކޮށްފައި ހުރެދާނެކަމަށް ބެލެވޭ ޖާގަ އޮތްކަމަށް އޮޑިޓަރުން ވަނީ ފާހަގަކޮށްފައެވެ.
އޮޑިޓް ކުރި މުއްދަތުގައި ނަގުދު ފައިސާގެ ގޮތުގައި ދޫކުރި 1.5 މިލިއަން ރުފިޔާ ހަރަދުކުރިގޮތުގެ ރިޕޯޓާއި ބިލުތައް ވަނީ ލިބިފައިނުވާކަން އޮޑިޓުން ހާމަވެފައިވެއެވެ. މީގެ އިތުރުން، އެމްޑީ ބިއުރޯއިން ޕެޓީ ކޭޝްގެ ގޮތުގައި ހޭދަކުރި 6.4 މިލިއަން ރުފިޔާގެ ތެރެއިން 800،000 ރުފިޔާ ހަރަދުކުރި ގޮތުގެ އެއްވެސް ތަފްސީލެއް އޮޑިޓަރުންނަށް ލިބިފައެއް ނުވެއެވެ.
ރަށްރަށުގައި ހިންގާ މަޝްރޫޢުތަކުގެ ނަމުގައި ވަގުތީ މުވައްޒަފުންގެ އަމިއްލަ އެކައުންޓުތަކަށް ބޮޑެތި އަދަދުތަކުން ފައިސާ ޖަމާކުރަމުން ދިޔުމަކީ ކުންފުނީގެ ފައިސާ ނަހަމަ ގޮތުގައި ބޭނުން ކުރުމަށް މަގުފަހިވާ ކަމެއްކަމަށް އޮޑިޓް އޮފީހުން ވަނީ އިންޒާރު ދީފައެވެ.
މި މައްސަލަތަކާ އެކު، 2021 އިން 2023 އަށް ފެނަކައިން ހިންގި ޕްރޮޖެކްޓުތަކުގެ ތެރެއިން 61 މިލިއަން ރުފިޔާ ހަރަދުކޮށްފައިވަނީ ކޮން ޕްރޮޖެކްޓުތަކަކަށްކަން ޔަގީންކަމާއެކު ބުނެވޭނެ ގޮތެއް ނެތްކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.
އޮޑިޓް ރިޕޯޓުން ހާމަވި އެހެން ބޮޑު މައްސަލައެއްގެ ގޮތުގައި، އޮޑިޓް މުއްދަތުގައި ހިދުމަތާއި ތަކެތި ހޯދުމަށް އެކި ފަރާތްތަކާ ހަވާލުކުރި 2.2 ބިލިއަން ރުފިޔާގެ މަސައްކަތުގެ ތެރެއިން 1.3 ބިލިއަން ރުފިޔާގެ މަސައްކަތް ހަވާލުކޮށްފައިވަނީ ވާދަވެރި ބީލަމަކަށް ހުޅުވާލުމެއްނެތި، ގަވާއިދުން ބޭރުން ކަމަށް ފާހަގަކުރެވިފައިވެއެވެ.
ކޮމެންޓު ފޮނުވާ