ރާއްޖޭގެ ހުރިހާ އަތޮޅަކުން ޕާސްޕޯޓް ހެއްދުމުގެ ޚިދުމަތް އަންނަ މަހުގެ ނިޔަލަށް ފޯރުކޮށްދެވޭނެ އިންތިޒާމު ހަމަޖެއްސުމުގެ މަސައްކަތް ކުރިއަށްދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ވ. އަތޮޅު ފެލިދޫގައި ރައްޔިތުންނާ ބައްދަލުކުރެއްވި ރައީސް ވިދާޅުވީ، އިރާދަކުރެއްވިއްޔާ އަންނަ މަސް ނިމުމުގެ ކުރިން ކޮންމެ އަތޮޅެއްގައި މަދުވެގެން އެއް ރަށުގައި ޕާސްޕޯޓް ހެއްދުމުގެ ޚިދުމަތް ލިބޭނެ އިންތިޒާމު ހަމަޖެހިގެންދާނެ ކަމަށެވެ. އަދި ބައެއް އަތޮޅުތަކުގައި ދެ ރަށުގައި ނުވަތަ ތިން ރަށުގައިވެސް ޕާސްޕޯޓާއި އައިޑީ ކާޑު ދޫކުރުމުގެ ޚިދުމަތް ޤާއިމުކުރެވޭނެކަމަށް ރައީސް ފާހަގަކުރެއްވިއެވެ.
ފެލިދެއަތޮޅަށް ކުރެއްވި ދަތުރުފުޅުގެ ތެރެއިން ފެލިދޫގައި ބޭއްވި މި ޖަލްސާގައި، ވ. އަތޮޅުގައި ފުރަތަމަ ފަހަރަށް ޕާސްޕޯޓު ދޫކުރުމުގެ ޚިދުމަތް ރަސްމީކޮށް ފެށިގެން ދިޔައެވެ. މި ޚިދުމަތް ފައްޓަވައިދެއްވީ އިމިގްރޭޝަންގެ ޑެޕިއުޓީ ކޮންޓްރޯލަރ އަހުމަދު އަޝްފާންއެވެ.
ވ. އަތޮޅުގައި މި ޚިދުމަތް ފެށުމާއެކު، މިހާރު ރާއްޖޭގެ 14 އަތޮޅެއްގައި ޕާސްޕޯޓް ހެއްދުމުގެ ޚިދުމަތް ފޯރުކޮށްދޭން ފަށާފައިވާކަމަށް ސަރުކާރުން މަޢުލޫމާތު ދީފައިވެއެވެ. މި އިންތިޒާމުތައް ހަމަޖެހުމުން، އަތޮޅުތެރޭގެ ރައްޔިތުން ޕާސްޕޯޓް ހެއްދުމަށްޓަކައި މާލެ އަންނަން މަޖުބޫރުވާ ދަތިތަކަށް ހައްލެއް ލިބިގެންދާނެކަމަށް ސަރުކާރުން ބުނެއެވެ.
ކޮމެންޓު ފޮނުވާ