ސިޔާސީ ބޭނުމުގައި ގަސްތުގައި ރައްޔިތުންނަށް ދެރަ ދިނުމަށް ޓަކައި ބަޔަކު ބައެއް ކަންތައްތައް އެބަކުރެޔޭ: ރައީސް

ބާޒާރުގައި ބައެއް ބާވަތުގެ ތަކެތީގެ އަގު، އަމިއްލަ ވިޔަފާރިވެރިން ގަސްތުގައި ބޮޑުކޮށްފައިވާ ކަމަށް ރައީސް ޑރ. މުޙައްމަދު މުއިއްޒު ތުހުމަތު ކުރައްވައިފިއެވެ. ރޭ ފެލިދޫގައި ވާހަކަފުޅު ދައްކަވަމުން ރައީސް ވިދާޅުވީ، ސިޔާސީ ބޭނުމުގައި ބައެއް ވިޔަފާރިތަކުން ރައްޔިތުންނަށް އުނދަގޫ ކުރުމަށް މަސައްކަތް ކުރާ ކަމަށެވެ.

ރައީސް ވިދާޅުވި ގޮތުގައި، ސަރުކާރުގެ ވިޔަފާރި ކުންފުނި އެސްޓީއޯ މެދުވެރިކޮށް 20 ބާވަތުގެ ތަރުކާރީއާއި މޭވާ އެތެރެކުރުމަށް ނިންމީ، ރައްޔިތުންގެ ހައްގު ހިމާޔަތްކުރުމަށެވެ. އެއީ 10 ބާވަތުގެ މޭވާއާއި 10 ބާވަތުގެ ތަރުކާރީއެވެ.

ޓޫރިސްޓް ރިސޯޓުތަކާއި ގެސްޓުހައުސްތަކުން އާމްދަނީގެ ވަކި އިންސައްތައެއް ޑޮލަރުން ބޭންކުތަކަށް ވިއްކަންޖެހޭ ގޮތަށް ގާނޫނަށް ގެނައި އިސްލާހާއެކު، ބޭންކުތަކަށް ޑޮލަރު ލިބެން ފެށި ކަމަށާއި، މިކަމުގެ ސަބަބުން ވިޔަފާރިތަކަށް ބޭންކު ރޭޓުގައި ޑޮލަރު ލިބި، ތަކެތީގެ އަގު ހެޔޮވަން ފެށި ކަމަށް ރައީސް ފާހަގަކުރެއްވިއެވެ.

"އިހަށް ދުވަހު ޑޮލަރު ނުލިބޭ، ބޭންކުން ޑޮލަރު ނުލިބިގެން ހަމަ އެއްވެސް ގޮތެއް ނެތިގެން އަގުބޮޑުކުރި އޮރެންޖާއި އާފަލު މިހާރު ތިރިވެގެން ހިނގައްޖެ އަގު. ސިޔާސީ ބޭނުމެއްގައި އޯގަނައިޒް ގޮތެއްގައި ގަސްތުގައި ބަޔަކު ރައްޔިތުންނަށް ދެރަ ދިނުމަށް ޓަކައި ބައެއް ކަންތައްތައް އެބަކުރޭ" ރައީސް ވިދާޅުވިއެވެ.

ރައީސް އިތުރަށް ވިދާޅުވީ، އަގު ހެޔޮވަން ފެށުމާއެކު ބައެއް ވިޔަފާރިވެރިން ސިޔާސީ މަގުސަދުގައި ރައްޔިތުންނަށް ދަތިކުރުމަށް މަސައްކަތް ކުރިނަމަވެސް، ސަރުކާރުން އެފަދަ ފުރުސަތެއް ނުދޭނެ ކަމަށެވެ. މީގެ ކުރިން ވެސް އެފަދަ ފުރުސަތު ދީފައި ނުވާ ކަމަށް ރައީސް ވިދާޅުވިއެވެ.

މިދިޔަ ބުދަ ދުވަހު ރައީސްގެ ޕޮޑްކާސްޓުގައި ވާހަކަދައްކަވަމުން، އެސްޓީއޯއިން މޭވާއާއި ތަރުކާރީ އެތެރެކުރުމަކީ އަމިއްލަ ވިޔަފާރިތަކުގެ މަސައްކަތަށް ހުރަސް އެޅުމެއް ނޫން ކަމަށް ވިދާޅުވިއެވެ. މިފަދަ ނިންމުންތައް ނިންމަނީ ރަނގަޅަށް ދިރާސާކޮށް، ހިސާބުޖަހައިގެން ކަމަށް ވެސް ރައީސް ފާހަގަކުރެއްވިއެވެ.

އެސްޓީއޯއިން މި މަސައްކަތް ފެށުމާ ގުޅިގެން އިދިކޮޅު ފަރާތްތަކުން ވަނީ، ސަރުކާރުން އަމިއްލަ ވިޔަފާރިތަކުގެ ތެރެއަށް ވަދެ، ވިޔަފާރިތައް ނެތިދާނެ ކަމުގެ ކަންބޮޑުވުން ފާޅުކޮށްފައެވެ.

މީގެ އިތުރުން، މި އަހަރުގެ މޭ މަހު ބޭއްވި ނޫސްވެރިންގެ ބައްދަލުވުމުގައި ރައީސް ވަނީ، ބައެއް ބޭސް ލިބުން ދަތިވެ އަގު ބޮޑުވީ، ބޭސް އެތެރެކުރާ ވިޔަފާރިވެރިން ސަރުކާރުގެ ނިންމުންތަކާ ހިތްހަމަ ނުޖެހިގެން ގަސްތުގައި ބޭސް އެތެރެކުރުން ހުއްޓާލުމުން ކަމަށް ވެސް ތުހުމަތު ކުރައްވާފައެވެ.