ދައުލަތުގެ ޚަރަދު ކުޑަކުރުމުގެ ގޮތުން ކުރީގެ ރައީސުންނާއި މަޖިލީހުގެ މެންބަރުންނަށް ލިބެމުންދާ އިނާޔަތްތަކަށް މުހިންމު ބަދަލުތަކެއް ގެންނަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މި އިސްލާހުތައް އަންނަ މަޖިލީހުގެ ދައުރުގައި ހުށަހެޅުއްވާނެކަމަށް ރައީސް ވިދާޅުވިއެވެ.
ކުރީގެ ރައީސުންނަށް ދައުލަތުން ކުރާ ޚަރަދަކީ އެހާމެ ބޮޑު އަދަދެއް ކަމަށާއި، ޤައުމުގެ އިޤްތިޞާދީ ހާލަތަށް ބަލާއިރު މިކަމަށް ބަދަލު ގެނައުން މުހިންމުކަމަށް ރައީސް މުޢިއްޒު ފާހަގަކުރެއްވިއެވެ. ހަމައެހެންމެ ކުރީގެ މަޖިލިސް މެންބަރުންނަށް ދޭ އިނާޔަތްތަކާ ގުޅޭގޮތުން ރައްޔިތުން ފާޅުކުރާ ކަންބޮޑުވުންތަކަށް ރިޢާޔަތްކޮށް، އެކަމަށްވެސް އިސްލާހު ގެންނަން ޖެހިފައިވާކަމަށް ވިދާޅުވިއެވެ.
”ކުރީގެ ރައީސުންނަށް ދައުލަތުން ކުރަމުންދާ ހޭދައަކީ ވަރަށް ބޮޑު އަދަދެއް. ޤައުމުގެ ހާލަތަށް ރިޢާޔަތްކޮށް މިކަމަށް ބަދަލު ގެންނަން ޖެހޭ“
މީގެ އިތުރުން ރިޓަޔަރމަންޓް ޕެންޝަން ނިޒާމަށްވެސް އިސްލާހެއް ގެނެވޭނެއެވެ. ދައުލަތުގެ މުއައްސަސާތަކުން ރިޓަޔަރ ކުރުމަށްފަހު އެހެން މަޤާމެއްގައި ފުލްޓައިމްކޮށް މަސައްކަތް ކުރާ ފަރާތްތަކަށް ރިޓަޔަރމަންޓް ޕެންޝަން ނުލިބޭގޮތަށް ހަމަޖައްސާނެކަމަށް ރައީސް ހާމަކުރެއްވިއެވެ.
ސަރުކާރުން މި ފިޔަވަޅުތައް އަޅުއްވަނީ ދައުލަތުގެ ބޮޑުވެފައިވާ ޚަރަދުތައް ކޮންޓްރޯލްކޮށް، އިޤްތިޞާދަށް ދިމާވެފައިވާ ދަތިތައް ހައްލުކުރުމުގެ މަޤްޞަދުގައެވެ. މި އިސްލާހުތަކުގެ ސަބަބުން ދައުލަތުގެ މާލީ ހާލަތު ހަރުދަނާވެ، ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ފުޅާކުރުމަށް މަގުފަހިވާނެކަމަށް ސަރުކާރުން ބުނެއެވެ.
މި އިސްލާހުތަކަކީ ދައުލަތުގެ ރިކަރަންޓް ޚަރަދު ކުޑަކުރުމަށް ސަރުކާރުން ކުރައްވާ މަސައްކަތުގެ ބައެއްކަމަށާއި، މިފަދަ ފިޔަވަޅުތަކުގެ ސަބަބުން ތަރައްޤީގެ މަޝްރޫޢުތަކަށާއި ރައްޔިތުންގެ ބޭނުންތަކަށް އިސްކަންދެވޭނެކަމަށް އުންމީދުކުރެވެއެވެ.
ކޮމެންޓު ފޮނުވާ