ކޮންމެ މީހެއްގެ އަބުރު ރައްކާތެރިކުރުމަކީ މާތްﷲ ކަނޑައެޅުއްވި ހައްގެއް ކަމަށާއި، 100 ޕަސަންޓް މުސްލިމު ގައުމެއްގައި މިކަމާ ބަހުސްކުރާކަށް ނުޖެހޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައްޔިތުންގެ ޕޮޑްކާސްޓުގައި މިއަދު ރައީސް މިހެން ވިދާޅުވީ، ރައްޔިތުންގެ މަޖިލީހުން އިއްޔެ ފާސްކުރި މީޑިއާ ކޮމިޝަން ބިލާ ގުޅޭގޮތުން ވާހަކަދައްކަވަމުންނެވެ.
މީޑިއާ ރެގިއުލޭޓްކުރަން އުފައްދާ މި ކޮމިޝަނުން މިނިވަން ނޫސްވެރިކަމަށް ހުރަސްއަޅާނެ ކަމަށް ބުނެ، ނޫސްވެރިން ދުވަސްތަކެއް ވަންދެން މުޒާހަރާކޮށްފައިވެއެވެ. އަދި ގިނަ ނޫސްވެރިން ސޮއިކޮށް، ބިލު ބޭރުކުރުމަށް އެދި ރައީސް އޮފީހާއި މަޖިލީހަށް ޕެޓިޝަނެއް ހުށަހެޅި ނަމަވެސް، މަޖިލީހުން ބުނެފައިވަނީ ބިލް ފާސްކޮށްފައިވަނީ ޕެޓިޝަންގައި ހުރި ކަންކަމަށް ރިއާޔަތް ކުރުމަށްފަހު ކަމަށެވެ.
ރައީސް މުއިއްޒު ވިދާޅުވީ، އަނެކާއަށް ގެއްލުންވާނެ ކަންކަން ވިސްނުމެއް ނެތި، ހިތަށް އެރިހާ އެއްޗެއް ލިޔުމަކީ އިންސާނީ ސިފައެއް ނޫން ކަމަށެވެ. އިސްލާމްދީނުގެ މައިގަނޑު ފަސް މަގްސަދުގެ ތެރޭގައި އަބުރު ރައްކާތެރިކުރުން ހިމެނޭ ކަމަށާއި، ކޮންމެ މީހަކަށްވެސް ކަރާމާތާއި އިއްޒަތާއި އަބުރު ލިބިގެންވާ ކަމަށް ވިދާޅުވިއެވެ.
"މި ހައްގު ކަނޑައެޅުއްވީ އަޅުގަނޑެއް ނޫން، ޝަކީބެއްވެސް ނޫން. މާތްﷲ ސުބްހާނަހޫ ވަތައާލާ ކަނޑައެޅުއްވި ހައްގެއް. އެހެންކަމުން އަބުރު ރައްކާތެރިކުރުމަކީ ކޮންމެ މީހެއްގެ ހައްގެއް، އަދި އަނެކުންގެ ޒިންމާއެއް. 100 ޕަސަންޓް އިސްލާމީ ގައުމެއްގައި މިކަމާ ބަހުސްކުރާކަށް ނުޖެހޭ،" ރައީސް ވިދާޅުވިއެވެ.
އެހެންނަމަވެސް، ހަމަތަކާއި އުސޫލުތަކުގެ ތެރޭގައި ބޭނުން ވާހަކައެއް ދައްކަން، ލިޔަން، އަދި ކޮންޓެންޓް ކްރިއޭޓްކުރަން ފުރުސަތު އޮންނާނެ ކަމަށް ރައީސް ވިދާޅުވިއެވެ. ހަގީގަތެއް ނެތް ދޮގު ވާހަކަތައް ފެތުރުމަކީ ރާއްޖޭގެ ރައްޔިތުން ބޭނުންވާ ކަމެއް ނޫން ކަމަށްވެސް ރައީސް ފާހަގަކުރެއްވިއެވެ.
ކޮމެންޓު ފޮނުވާ