ޢަރަބި އިސްލާމީ ޤައުމުތަކުގެ ކުއްލި ބައްދަލުވުމުގައި ބައިވެރިވެވަޑައިގެންނެވުމަށްޓަކައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ޤަޠަރުގެ ވެރިރަށް ދޯހާއަށް ވަޑައިގެންފިއެވެ. މިއަދު ކުރިއަށްދާ މި މުހިންމު ސަމިޓުގައި ރައީސުލްޖުމްހޫރިއްޔާ ޚާއްޞަ ބަޔާނެއް އިއްވަވާނެއެވެ.
ސެޕްޓެމްބަރު 9ވަނަ ދުވަހު އިސްރާއީލުން ދޯހާއަށް ދިން ޙަމަލާއާ ގުޅިގެން ބާއްވާ މި ސަމިޓަކީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ މެންބަރު ޤައުމުތަކުގެ ލީޑަރުން އެއްވެ، ފަލަސްޠީނުގައި ދިމާވަމުންދާ ހާލަތާ ގުޅޭގޮތުން މަޝްވަރާކުރުމަށް ލިބޭ މުހިންމު ފުރުސަތެކެވެ. މި ބައްދަލުވުމުގެ ތައްޔާރީ މަސައްކަތްތަކުގައި ބައިވެރިވުމަށް ޚާރިޖީ ވަޒީރު ޑރ. އަބްދުﷲ ޚަލީލް ވެސް ވަނީ ކުރިން ޤަޠަރަށް ވަޑައިގެން، ބޭނުންވާ ތައްޔާރީތައް ފުރިހަމަކުރައްވާފައެވެ.
ރައީސުލްޖުމްހޫރިއްޔާގެ އޮފީހުން ވިދާޅުވި ގޮތުގައި، މި ސަމިޓުގައި ރައީސް މުޢިއްޒު ބައިވެރިވެވަޑައިގަތުމަކީ ދިވެހިރާއްޖެއާއި ޤަޠަރާ ދެމެދުގައި އޮތް ގާތް ގުޅުމާއި، ފަލަސްޠީނުގެ ރައްޔިތުންގެ ޙައްޤުތައް ރައްކާތެރިކުރުމަށް ރާއްޖެއިން ކުރަމުންދާ އިޚްލާޞްތެރި މަސައްކަތް ފާހަގަކޮށްދޭ ކަމެކެވެ. އިސްރާއީލުން ފަލަސްޠީނުގައި ކުރަމުންދާ ލާއިންސާނީ ޢަމަލުތައް ވަގުތުން ހުއްޓުވުމަށް ބައިނަލްއަޤްވާމީ މުޖުތަމަޢު އެކުގައި މަސައްކަތްކުރުމަށް ދިވެހިރާއްޖެއިން ގޮވާލަމުންދާކަން މި ޒިޔާރަތުން އިތުރަށް ހާމަކޮށްދޭނެ ކަމަށް ވެސް އޮފީހުން ފާހަގަކުރެއްވިއެވެ.
މި ވަގުތަކީ މުސްލިމު އުއްމަތު އެކުވެރިވެ، އެއް އަޑަކުން ވާހަކަދައްކަންޖެހޭ ވަރަށް މުހިންމު ވަގުތެކެވެ. މި ސަމިޓުގެ ތެރެއިން މުސްލިމު ޤައުމުތަކުގެ އަޑު ގަދަކޮށް، ފަލަސްޠީނުގައި ހިނގަމުންދާ އިންސާނީ ކާރިސާ ނިމުމަކަށް ގެނައުމަށާއި، މެދުއިރުމަތީ ސަރަޙައްދުގައި ސުލްޙަވެރިކަން ޤާއިމުކުރުމަށް ބައިނަލްއަޤްވާމީ ފެންވަރުގައި ޢަމަލީ ފިޔަވަޅުތައް އެޅުމަށް މަގުފަހިވާނެ ކަމަށް އުއްމީދުކުރެވެއެވެ.
ޣައްޒާގައި އިސްރާއީލުން ކުރަމުންދާ ޖެނޮސައިޑާ ގުޅިގެން ރާއްޖެއިން ވަނީ ކުރިން ވެސް ބައިނަލްއަޤްވާމީ ފޯރަމްތަކުގައި ކަންބޮޑުވުން ފާޅުކޮށް، ފަލަސްޠީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ގޮވާލާފައެވެ.
ކޮމެންޓު ފޮނުވާ