ކުރީގެ ރައީސުންނާއި މަޖިލިސް މެންބަރުންގެ އިނާޔަތް ކުޑަކުރަން ޖެހޭ: ރައީސް

ރާއްޖޭގެ ކުރީގެ ރައީސުންނާއި ރައްޔިތުންގެ މަޖިލީހުގެ ކުރީގެ މެންބަރުންނަށް ދައުލަތުން ދެމުންގެންދާ އިނާޔަތްތައް ކުޑަކުރުމަށް ރައީސް ޑރ. މުހައްމަދު މުއިއްޒު ތާއީދުކުރައްވާކަން ހާމަކުރައްވައިފިއެވެ. މިކަން ރައީސް ހާމަކުރެއްވީ ޕީއެންސީގެ ޕާލިމެންޓްރީ ގްރޫޕުގެ ވަޓްސްއެޕް ގްރޫޕަކަށް އިއްޔެ ފޮނުއްވި ޚާއްސަ މެސެޖަކުންނެވެ.

ރައީސް މުއިއްޒު ފޮނުއްވި މެސެޖުގައި ވިދާޅުވެފައިވަނީ، ގާނޫނުގެ ދަށުން މިވަގުތު ކުރީގެ ރައީސުންނާއި ކުރީގެ މަޖިލިސް މެންބަރުންނަށް ލިބެމުންދާ އިނާޔަތްތައް މަދުކުރުމަކީ އެމަނިކުފާނު ދެކިވަޑައިގަންނަވާ ގޮތުގައި މުހިންމު ކަމެއް ކަމަށާއި، މިއީ ރައްޔިތުންގެ އެދުމާ އެއްގޮތްވާ ކަމެއް ކަމަށެވެ.

މިވަގުތު އަމަލުކުރަމުންދާ ގާނޫނުގައިވާ ގޮތުން، އެއް ދައުރަށް ރައީސްކަން ކުރެއްވި ބޭފުޅުންނަށް މަހަކު 50،000 ރުފިޔާ ލިބިވަޑައިގަންނަވާއިރު، އެއް ދައުރަށްވުރެ ގިނަ މުއްދަތަކަށް ރައީސްކަން ކުރެއްވި ބޭފުޅުންނަށް 75،000 ރުފިޔާގެ މަހު އިނާޔަތެއް ލިބިވަޑައިގަންނަވައެވެ. މީގެ އިތުރުން ދިރިއުޅުއްވާ ތަނުގެ ޚަރަދުތަކަށް އިތުރު 50،000 ރުފިޔާ އާއި އޮފީސް ހިންގެވުމަށް 175،000 ރުފިޔާ ދައުލަތުން ދޭންޖެހޭކަމަށް ގާނޫނުގައި ބަޔާންކޮށްފައިވެއެވެ.

ރައްޔިތުންގެ މަޖިލީހުގެ ކުރީގެ މެންބަރުންނަށް ދެވޭ އިނާޔަތްތަކަށް ބަލާއިރު، އެއް ދައުރު ފުރިހަމަކުރެއްވި މެންބަރުންނަށް މުސާރައިގެ 30 ޕަސެންޓް ނުވަތަ މަދުވެގެން 18،000 ރުފިޔާ ލިބިވަޑައިގަންނަވައެވެ. ދެ ދައުރު ފުރިހަމަކުރެއްވި މެންބަރުންނަށް މުސާރައިގެ 45 ޕަސެންޓް ނުވަތަ މަދުވެގެން 27،000 ރުފިޔާއަށްވުރެ ބޮޑު އަދަދެއް ލިބިވަޑައިގަންނަވައެވެ. އެހެންނަމަވެސް ދައުލަތުގެ އެހެން ވަޒީފާއެއް އަދާކުރައްވާ ނަމަ، އެ މުއްދަތުގައި މި ހިދުމަތުގެ އިނާޔަތް ނުލިބޭނެކަމަށް ގާނޫނުގައި ބުނެފައިވެއެވެ.

ރައީސް މުއިއްޒުގެ މި ހުށަހެޅުމަކީ ދައުލަތުގެ ޚަރަދުތައް ކުޑަކުރުމަށް ސަރުކާރުން ކުރައްވަމުން ގެންދަވާ މަސައްކަތުގެ ބައެއް ކަމަށް ބެލެވޭއިރު، މި ބަދަލުތައް ގެނައުމަށް ރައްޔިތުންގެ މަޖިލީހުން ގާނޫނަށް އިސްލާހު ގެންނަންޖެހޭނެއެވެ.