ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ މެނޭޖިން ޑިރެކްޓަރުކަމުގެ މަގާމުން އިއްޔެ ވަކިކުރެވުނު ހުސައިން ފަހުމީ، ރައީސް އޮފީހުގެ އިސް މަގާމަކަށް ޢައްޔަންކުރައްވައިފިއެވެ. ލިބިފައިވާ މަޢުލޫމާތުތަކުން އެނގޭ ގޮތުގައި ފަހުމީ ޢައްޔަންކުރައްވާފައިވަނީ މިނިސްޓަރެއްގެ ފެންވަރުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމަށެވެ.
27 އަހަރަށްވުރެ ގިނަ ދުވަހު ސްޓެލްކޯގައި ޚިދުމަތް ކޮށްފައިވާ ފަހުމީ، ނޮވެމްބަރު 2023ގައި މި ސަރުކާރު ވެރިކަމާ ހަވާލުވުމާއެކު ސްޓެލްކޯގެ އެމްޑީކަމާ ހަވާލުވެފައި ވަނިކޮށް އިއްޔެ ވަނީ އެ މަގާމުން ވަކިކޮށްފައެވެ. މަގާމުން ވަކިކުރެވުމާ ގުޅިގެން އެކްސްގައި ކުރެއްވި ޕޯސްޓެއްގައި ފަހުމީ ވަނީ ސްޓެލްކޯގެ ވެރިޔާގެ މަގާމުގައި މަސައްކަތް ކުރުމުގެ ފުރުސަތު ދެއްވިކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ޝުކުރު އަދާކުރައްވާފައެވެ.
ސްޓެލްކޯގެ ކާމިޔާބީގެ ފަހަތުގައި އެންމެ މުހިންމު ބާރަކީ އެ ކުންފުނީގެ އެގްޒެކެޓިވުންނާއި މުވައްޒަފުންގެ ބުރަ މަސައްކަތާއި ވަފާތެރިކަން ކަމަށް ފާހަގަކުރައްވާ ފަހުމީ ވިދާޅުވީ، އެ ހުރިހާ ބޭފުޅުންނަށްވެސް ޚާއްޞަ ޝުކުރެއް ރައްދުކުރައްވާ ކަމަށެވެ. އަދި އެކުގައި ޙާޞިލުކުރި އެންމެހައި ކާމިޔާބީތަކާމެދު ފަޚުރުވެރިވާ ކަމަށްވެސް ފަހުމީ ފާހަގަކުރެއްވިއެވެ.
ފަހުމީގެ ބަދަލުގައި ސްޓެލްކޯގެ އައު މެނޭޖިން ޑިރެކްޓަރަކަށް އިއްޔެ ޢައްޔަންކުރައްވާފައި ވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ކުރީގެ ސީއީއޯ އަހުމަދު ޝަމާހު ރަޝީދެވެ. ސްޓެލްކޯގެ އެމްޑީކަމަށް ޢައްޔަންކުރެވުނުއިރު ޝަމާހު ހުންނެވީ ފިޝަރީޒް މިނިސްޓްރީގެ ސްޓޭޓް މިނިސްޓަރެއްގެ މަގާމުގައެވެ.
ކޮމެންޓު ފޮނުވާ