މިޞްރުގެ މަތުރޫހު ޕްރޮވިންސުގައި އޮގަސްޓު 31 ވަނަ ދުވަހު ހިނގި ރޭލު ހާދިޘާއެއްގައި ތިން މީހުން މަރުވެ، 103 މީހުންނަށް އަނިޔާވެފައިވާ ކަމަށް އެ ޤައުމުގެ ނޭޝަނަލް ރެއިލްވޭސް އޮތޯރިޓީން ހާމަކޮށްފައިވެއެވެ.
މަރްސާ މަތުރޫހުން ވެރިރަށް ކައިރޯއަށް ދަތުރުކުރަމުން ދިޔަ ރޭލު ފުރޮޅާލުމުގެ ސަބަބަކީ ރޭލު ދުއްވާ ޓްރެކުން ކަހައިލުން ކަމަށް ތަޙްޤީޤުތަކުން ދައްކައެވެ. ހާދިޘާގައި ޒަޚަމްވި މީހުންނަށް އެކި ވަރުގެ އަނިޔާތައް ލިބި، މަތުރޫހާއި އަވަށްޓެރި ޕްރޮވިންސުތަކުގެ ހަސްޕަތާލުތަކަށް ގެންދިޔަ ކަމަށް މިޞްރުގެ ޞިއްޙީ ވުޒާރާއިން މަޢުލޫމާތު ދީފައިވެއެވެ.
ޞިއްޙީ ވުޒާރާގެ އެންމެ ފަހުގެ މަޢުލޫމާތުތަކުން ދައްކާ ގޮތުގައި، ފަރުވާ ދިނުމަށްފަހު 98 މީހުން ހަސްޕަތާލުން ދޫކޮށްލާފައިވާއިރު، ބާކީ މީހުންނަށް ދަނީ ފަރުވާ ދެމުންނެވެ. ހާދިޘާ ހިނގި ސަރަޙައްދުގައި ކަމާބެހޭ އިދާރާތަކުން ޙަރަކާތްތެރިވަމުން ދާއިރު، އެ ސަރަޙައްދު ސާފުކޮށް ރޭލު ޚިދުމަތް އަލުން ފެށުމުގެ މަސައްކަތް ކުރިއަށް ގެންދެއެވެ.
މި ހާދިޘާއާ ގުޅިގެން މިޞްރުގެ ދަތުރުފަތުރާބެހޭ ވުޒާރާއިން ވަނީ ފުޅާދާއިރާއެއްގައި ތަޙުޤީޤު ފަށައި، ހާދިޘާ ހިނގުމަށް މެދުވެރިވި ސަބަބުތައް ދެނެގަތުމުގެ މަސައްކަތް ކުރަމުންދާ ކަމަށް ބުނެފައެވެ. އަދި މައްސަލައިގައި ކުށްވެރިވާ ފަރާތްތަކާ ދެކޮޅަށް އެންމެ ހަރުކަށި ފިޔަވަޅުތައް އަޅާނެ ކަމަށް ވުޒާރާއިން ވަޢުދުވެފައިވެއެވެ.
މެދުއިރުމަތީގެ އެންމެ ދުވަސްވީ ރޭލު ނިޒާމުތަކުގެ ތެރޭގައި ހިމެނޭ މިޞްރުގެ ރޭލު ނިޒާމު ތަރައްޤީކުރުމަށް ފަހުގެ އަހަރުތަކުގައި އެތައް ބިލިޔަން ޑޮލަރެއް ޚަރަދުކޮށްފައިވީ ނަމަވެސް، މިފަދަ ހާދިޘާތައް ތަކުރާރުވަމުން ދިއުމަކީ އެ ޤައުމުގެ ދަތުރުފަތުރުގެ ނިޒާމަށް ކުރިމަތިވެފައިވާ ބޮޑު ގޮންޖެހުމެކެވެ.
ކޮމެންޓު ފޮނުވާ