މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އަށް ހުޅުމާލޭގައި ޒަމާނީ ފެންވަރުގެ ފެސިލިޓީއެއް ގާއިމުކޮށް، އެ ތަނުގައި ބިލިއާޑުގެ ގައުމީ ޓީމުގެ ކުޅުންތެރިންނަށް ކުޅެވޭނެ ގޮތް ހަމަޖައްސައި ފަރިތަކުންތައް ފަށައިފިއެވެ.
މީގެ ކުރިން ވަރަށް ދަތިކޮށް ވަސީލަތްތައް ގާއިމުކުރެވިފައިވާ ބިލިއާޑަށް ރަނގަޅު ފެންވަރުގެ ފެސިލިޓީއެއް ސަރުކާރުން ގާއިމްކޮށްފައިވާއިރު، ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ސަރުކާރުން މަސައްކަތް ކުރަމުންދަނީ ވަކި ކުޅިވަރަކަށް ވަކި ގޮތަކަށް ނޫން ކަމަށާއި، ހުރިހާ ކުޅިވަރަކަށްވެސް ޒަމާނީ ވަސީލަތްތައް ގާއިމުކޮށް، އެ ކުޅިވަރެއްގެ ކުޅުންތެރިންނަށް ހޯދައިދެވޭނެ އެންމެ ރަނގަޅު ވަސީލަތް މި ސަރުކާރުން ހޯދައިދޭނެ ކަމަށެވެ.
ހުޅުމާލޭގައި އެމްޕީބީއޭއަށް ލިބުނު ފެސިލިޓީއަކީ މާލޭގައި ކުރިން އެ އެސޯސިއޭޝަނަށް ލިބުނު ފެސިލިޓީއަށް ވުރެވެސް ބޮޑު އަދި ޖާގަވެސް ތަނަވަސް ތަނެއް ކަމަށް އެމްޕީބީއޭއިން ބުނެއެވެ. ކުރިން މާލޭގައި ހަތަރު މޭޒު ބަހައްޓައިގެން ބިލްއާޑް މުބާރާތްތައް ބާއްވަމުން އައިރު، އަލަށް ހުޅުމާލެއިން ލިބިގެންދިޔަ ފެސިލިޓީގައި ހަ މޭޒު ބެހެއްޓޭ ކަމަށް އެމްޕީބީއޭއިން ބުނެއެވެ.
Happy to announce that we are working with @maldivespool to open Hulhumalè Billiard House. It will be located in Hulhumalè Mini Sports Complex. ? ?? pic.twitter.com/NiIr2dJaLx
— Ahmed Mahloof (@AhmedMahloof) October 10, 2020
ހުޅުމާލޭ ސްޕޯޓްސް ކޮމްޕްލެކްސްގައި އަލަށް ހެދިގެންދިޔަ ފެސިލިޓީގެ ބޭނުން ބިލިއާޑުގެ އާއިލާއަށް ހުޅުވާލާފައިވާއިރު، ތަން ބޭނުންކުރުމުގެ ފުރުސަތު ލިބިގެންދާނީ މެންބަރުންނަށް ކަމަށް އެމްޕީބީއޭއިން ބުނެއެވެ. ބިލިއާޑުގެ މެންބަރުކަން ސީރިއަސްކޮށް ކުޅެން ބޭނުންވާ ކޮންމެ މީހަކަށްވެސް ލިބިގެންދާނެ ކަމަށާއި، މެންބަރުންނަށް ކުޅެވޭ ގޮތަށް ހަދާފައިވަނީވެސް ސީރިއަސްކޮށް ބިލއާޑް ކުޅޭނެ ކުޅުންތެރިން ނެރުމަށް ކަމަށް އެސޯސިއޭޝަނުން ވިދާޅުވިއެވެ.
ހުޅުމާލޭގައި ޒަމާނީ ފެންވަރުގެ ފެސިލިޓީއެއް ބިލިއާޑަށް ހަމަޖެއްސިއިރު، މާލޭގެ އެމްޕީބީއޭ ކުލަބު ހައުސް އަންނަނީ ދުނިޔޭގެ ފެންވަރުގެ ފެސިލިޓީއަކަށް ބަދަލުކުރުމަށް މަސައްކަތް ކުރަމުންނެވެ. މަހްލޫފް ވިދާޅުވީ އެ މަސައްކަތް ނިމޭއިރު ވޯލްޑް ޗެމްޕިއަންޝިޕް އަދި ބައިނަލްއަގުވާމީ ފެންވަރުގެ ބިލްއާޑް މުބާރާތްތައް އެތަނުގައި ކުޅެވިގެންދާނެ ކަމަށެވެ.
