ގއ. ވިލިނގިލީގައި އެމްޑީޕީ ސަރުކާރުން އިމާރާތްކުރި ރޯހައުސްތައް ބެހުމުގައި ނާއިންސާފު ހިންގާ ކަމަށް ބުނެ، ހަތަރު ކުދިންގެ މައެއް މިއަދު އެ ރަށު ކައުންސިލް އިދާރާ ކުރިމަތީގައި އިހްތިޖާޖު ކޮށްފިއެވެ.
ޚާލިދާ ނަމަކަށް ކިޔާ މި އަންހެން މީހާ، ކައުންސިލް އިދާރާގެ ދޮރުމަތީގައި އޮށޯވެގެން އޮވެ އިހްތިޖާޖު ކުރީ، ހާއްސަ އެހީއަށް ބޭނުންވާ ދަރިންނާއެކު އުޅޭ އޭނާއަށް ހައްގުވާ ރޯހައުސް، ނުހައްގުން އެހެން ބަޔަކަށް ދީފައިވާތީ ކަމަށް ބުނެއެވެ. އޭނާގެ ހަތަރު ދަރިންގެ ތެރޭގައި ހާއްސަ އެހީއަށް ބޭނުންވާ ކުދިން ތިބި ކަމަށް އޭނާ ބުންޏެވެ.
މި މައްސަލައާ ގުޅިގެން ވިލިނގިލީ ކައުންސިލުގެ ރައީސް ވިޝާލް މުހައްމަދު ވިދާޅުވީ، ރޯހައުސް ދިނުމުގެ އެންމެހައި ކަންތައްތައް ބަލަހައްޓަނީ ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗާ މިނިސްޓްރީން ކަމަށާއި، މާކްސް ދިނުމާއި ރޯހައުސް ބެހުމަކީ އެ މިނިސްޓްރީގެ ޒިންމާއެއް ކަމަށެވެ.
ވިޝާލް އިތުރަށް ވިދާޅުވީ، ރޯހައުސް ބެހުމާ ގުޅޭ އެއްވެސް ކަމެއްގައި ކައުންސިލުން ބައިވެރިވެފައި ނުވާ ކަމަށާއި، ޚާލިދާ އިހްތިޖާޖަށް ނުކުތީ ބައެއް ފަރާތްތަކުން ދޮގު މައުލޫމާތު ދީގެން ކަމަށެވެ.
ރައީސް ނަޝީދުގެ ސަރުކާރުން ވިލިނގިލީގައި އިމާރާތްކޮށް ނިމި 52 ރޯހައުސްގެ ތެރެއިން މިހާތަނަށް ދެ ރޯހައުސް ނުދެވި އޮތް ކަމަށާއި، އެ ދެ ރޯހައުސް ހޯދުމަށް ރަށުގެ ގިނަ މީހުން ކުރިމަތިލާފައިވާ ކަމަށް މައުލޫމާތު ލިބެއެވެ. މީގެ އިތުރުން ރައީސް އިބްރާހީމް މުހައްމަދު ޞާލިހުގެ ސަރުކާރުން ވިލިނގިލީގައި އިތުރު 50 ރޯހައުސް އިމާރާތް ކުރަން ފަށާފައިވީ ނަމަވެސް، މިހާރު އެ މަސައްކަތް ހުއްޓިފައިވާ ކަމަށް ވެސް މައުލޫމާތު ލިބެއެވެ.
ކައުންސިލުގެ ރައީސް ވިޝާލް ވިދާޅުވި ގޮތުގައި، މިހާރު ބާކީ އޮތް ދެ ރޯހައުސް ދޭނީ އަލަށް އިމާރާތް ކުރަން ފެށި 50 ރޯހައުސްއަށް ކުރިމަތިލި މީހުންނާ އެކުގައި، އެންމެން އެއްކޮށް ބަލައިގެން ކަމަށެވެ.
ކޮމެންޓު ފޮނުވާ